દુષ્કર્મના દોષિતોને ફાંસીની સજા આપતું બિલ બંગાળ વિધાનસભામાં પસાર

પશ્ચિમ બંગાળ વિધાનસભામાં 'અપરાજિતા મહિલા અને બાળકો (પશ્ચિમ બંગાળ ક્રિમિનલ લૉ એમેન્ડમેન્ટ) બિલ' સર્વસંમતિથી પસાર કરવામાં આવ્યું હતું. આ કાયદા હેઠળ, દુષ્કર્મ અને હત્યાના કેસમાં જ્યાં પીડિતાને મૃત્યુ માટે છોડી દેવામાં આવે છે તેમાં આરોપી માટે મૃત્યુદંડની જોગવાઈ છે

વિધાનસભામાં, ભાજપે વચન મુજબ બિલને સમર્થન આપ્યું હતું અને મતોના વિભાજનની માંગણી કરી ન હતી. મુખ્ય પ્રધાન મમતા બેનર્જીએ બિલ પરની ચર્ચાનો જવાબ આપતાં કહ્યું કે આ શરમજનક બાબત છે કે વડા પ્રધાન એ કામ ન કરી શક્યા જે તેમની સરકારે કર્યું. તેમણે કહ્યું કે વડાપ્રધાન મહિલાઓની સુરક્ષા માટે કોઈ પહેલ કરી શકતા ન હોવાથી તેમણે અને કેન્દ્રીય ગૃહમંત્રીએ રાજીનામું આપી દેવું જોઈએ.

દેશભરમાં કોલકાતાના આર.જી. કાર મેડિકલ કોલેજ અને હોસ્પિટલમાં મહિલા ડૉક્ટર પર દુષ્કર્મના અને હત્યાના વિરોધમાં ચાલી રહેલા વિરોધની વચ્ચે મમતા સરકારે વિશેષ સત્ર બોલાવીને આજે જ વિધાનસભામાં આ બિલ રજૂ કર્યું અને તેને પાસ કરાવ્યું. મુખ્યમંત્રીએ કહ્યું કે તે પીડિતા માટે સીબીઆઈ પાસેથી ન્યાય ઈચ્છે છે, જે હાલમાં કેસની તપાસ કરી રહી છે. તેમણે કહ્યું કે રાજ્યપાલે ઝડપથી બિલને મંજૂરી આપવી જોઈએ જેથી કરીને તેને રાષ્ટ્રપતિ પાસે મોકલી શકાય.

મુખ્યમંત્રીએ કહ્યું, “તે પછી તેને લાગુ કરવાની અને તેને અસરકારક બનાવવાની જવાબદારી આપણી રહેશે. તેથી, હું વિપક્ષના નેતાને વિનંતી કરું છું કે તેઓ રાજ્યપાલને આ બિલને ઝડપથી મંજૂર કરવા કહે. આ બિલને રાષ્ટ્રપતિની સંમતિની જરૂર પડશે કારણ કે તે કેન્દ્રીય કાયદાઓમાં કેટલીક જોગવાઈઓમાં સુધારો કરવાની દરખાસ્ત કરે છે.