ભારતીય ઉદ્યોગપતિ ગૌતમ અદાણી બન્યા વિશ્વના 11મા સૌથી ધનિક બિઝનેસમેન

ભારતીય ઉદ્યોગપતિ ગૌતમ અદાણી ફરી એકવાર વિશ્વના સૌથી ધનિક ઉદ્યોગપતિઓની યાદીમાં ટોપ 10ની ખૂબ નજીક આવી ગયા છે. ગૌતમ અદાણીએ સંપત્તિના મામલે રિલાયન્સ ઈન્ડસ્ટ્રીઝના મુકેશ અંબાણીને પણ પાછળ છોડી દીધા છે. હાલમાં ગૌતમ અદાણીની અંગત સંપત્તિ 111 અબજ ડોલર સુધી પહોંચી ગઈ છે, જ્યારે મુકેશ અંબાણીની વ્યક્તિગત સંપત્તિ 109 અબજ ડોલર છે. વિશ્વના સૌથી ધનિક ઉદ્યોગપતિઓની યાદીમાં ગૌતમ અદાણી 11મા સ્થાને અને મુકેશ અંબાણી 12મા સ્થાને છે.

નોંધનીય છે કે, જ્યારે હિંડનબર્ગ રિસર્ચે પોતાના રિપોર્ટમાં અદાણી ગ્રૂપ પર સ્ટોક મેનીપ્યુલેશન અને એકાઉન્ટિંગ ફ્રોડ સહિતના અનેક આરોપો લગાવ્યા હતા, તે સમયે ગૌતમ અદાણી, 150 અબજ ડોલરની વ્યક્તિગત સંપત્તિ સાથે વિશ્વના ટોચના 5 સૌથી ધનિક ઉદ્યોગપતિઓની યાદીમાં સામેલ હતા, પરંતુ આ રિપોર્ટમાં આરોપો બાદ અદાણી ગ્રુપના શેરમાં ભારે ઘટાડો જોવા મળ્યો હતો. ખુદ ગૌતમ અદાણીની સંપત્તિ 37.72 અબજ ડોલરના સ્તરે આવી ગઈ હતી, પરંતુ બાદમાં સુપ્રીમ કોર્ટના આદેશ અને અમેરિકન તપાસ એજન્સીઓના રિપોર્ટના આધારે હાથ ધરાયેલી તપાસમાં હિંડનબર્ગ રિસર્ચનો રિપોર્ટ પાયાવિહોણો અને સ્વપ્રેરિત હોવાનું બહાર આવતાં અદાણી ગ્રૂપના શેરોએ ફરી વેગ પકડ્યો હતો. આ તેજીના કારણે ગૌતમ અદાણી ફરી એકવાર 111 અબજ ડોલરની વ્યક્તિગત સંપત્તિ સાથે ભારત અને એશિયાના સૌથી ધનિક બિઝનેસમેન બનવામાં સફળ થયા છે.

બ્લૂમબર્ગ બિલિયોનેર્સ ઈન્ડેક્સ અનુસાર, ફ્રેન્ચ ઉદ્યોગપતિ અને લુઈસ વિટો (એલવીએમએચ) ના સ્થાપક બર્નાર્ડ આર્નોલ્ટ હાલમાં 207 અબજ ડોલરની નેટવર્થ સાથે વિશ્વના સૌથી ધનિક ઉદ્યોગપતિઓની યાદીમાં પ્રથમ ક્રમે છે. જ્યારે ટેસ્લાના સંસ્થાપક એલોન મસ્ક 203 અબજ ડોલરની સંપત્તિ સાથે બીજા સ્થાને છે અને એમેઝોનના જેફ બેઝોસ 199 અબજ ડોલરની સંપત્તિ સાથે આ યાદીમાં ત્રીજા સ્થાને છે.

બ્લૂમબર્ગ બિલિયોનેર્સ ઈન્ડેક્સમાં, ગૌતમ અદાણી અને મુકેશ અંબાણી સિવાય ટોચના 100 અમીર ભારતીય ઉદ્યોગપતિઓમાં, શાપૂરજી મિસ્ત્રી 36.14 અબજ ડોલરની સંપત્તિ સાથે 44માં સ્થાને છે, સાવિત્રી જિંદાલ 32.62 અબજ ડોલરની સંપત્તિ સાથે 49માં સ્થાને છે, શિવ નાડર 31.61 અબજ ડૉલરની નેટવર્થ સાથે 51માં સ્થાને, 25.53 અબજ ડૉલરની નેટવર્થ સાથે અઝીમ પ્રેમજી 68માં સ્થાને, દિલીપ સંઘવી 23.82 અબજ ડોલરની નેટવર્થ સાથે 79માં સ્થાને, કુમાર બિરલા 20.90 અબજ ડોલરની નેટ વર્થ સાથે 89માં સ્થાને, લક્ષ્મી મિત્તલ 20.54 અબજ ડોલરની સંપત્તિ સાથે 95મા ક્રમે, સાયરસ પૂનાવાલા 20.51 અબજ ડોલરની સંપત્તિ સાથે 97મા ક્રમે અને રાધાકૃષ્ણ દામાણી 20.22 અબજ ડોલરની સંપત્તિ સાથે 100મા ક્રમે છે.