ભારતીય શેરબજાર ફ્લેટ ખુલ્યું, આઇટી શેરોમાં ખરીદી જોવા મળી

મિશ્ર વૈશ્વિક સંકેતો વચ્ચે ભારતીય શેરબજારની શરૂઆત બુધવારે ફ્લેટ રહી હતી. આ દરમિયાન સેન્સેક્સ 29.08 પોઈન્ટ અથવા 0.04 ટકાના વધારા સાથે 76,229.76 પર અને નિફ્ટી 28.30 પોઈન્ટ અથવા 0.12 ટકાના ઘટાડા સાથે 23,795.80 પર હતો.

શરૂઆતી કારોબારમાં સૂચકાંકોમાં નિફ્ટી આઈટી અને નિફ્ટી ફાર્મા ટોપ ગેનર હતા. તેની સાથે નિફ્ટી હેલ્થકેર, નિફ્ટી પીએસયુ બેંક, નિફ્ટી પ્રાઈવેટ બેંક, નિફ્ટી સર્વિસીસ, નિફ્ટી રિયલ્ટી, નિફ્ટી એફએમસીજી અને નિફ્ટી પીએસઈ લીલા નિશાનમાં હતા. નિફ્ટી ઓટો, નિફ્ટી કન્ઝ્યુમર ડ્યુરેબલ્સ, નિફ્ટી મેટલ, નિફ્ટી મીડિયા અને નિફ્ટી ઈન્ફ્રા લાલ નિશાનમાં હતા. 

મિડકેપ અને સ્મોલકેપમાં પણ મિશ્ર કારોબાર જોવા મળી રહ્યો હતો. નિફ્ટી મિડકેપ 100 ઈન્ડેક્સ 60.90 પોઈન્ટ અથવા 0.11 ટકાના વધારા સાથે 62,138.65 અને નિફ્ટી સ્મોલકેપ 100 ઈન્ડેક્સ 3 પોઈન્ટની નજીવી તેજી સાથે 18,823 પર હતો. 

સેન્સેક્સ પેકમાં ટેક મહિન્દ્રા, આઈસીઆઈસીઆઈ બેંક, ટ્રેન્ટ, ઈન્ફોસિસ, અદાણી પોર્ટ્સ, પાવર ગ્રીડ, બીઈએલ, સન ફાર્મા, ટીસીએસ, એલએન્ડટી, એસબીઆઈ, અલ્ટ્રાટેક સિમેન્ટ, એશિયન પેઈન્ટ્સ અને એમએન્ડએમ વધનારા શેરો હતા. ભારતી એરટેલ, એચસીએલ ટેક, મારુતિ સુઝુકી, ટાટા સ્ટીલ, એનટીપીસી, ટાઈટન, બજાજ ફિનસર્વ અને એચયુએલ ઘટનારા શેરો હતા. 

એક્સિસ ડાયરેક્ટના રિસર્ચ હેડ રાજેશ પલવિયાએ જણાવ્યું હતું કે, ઊંચા વેલ્યુએશન અંગેની ચિંતાઓ અને ફેડરલ રિઝર્વના કડક વલણની અપેક્ષાઓ વચ્ચે સેમિકન્ડક્ટર શેરોમાં નબળાઈને કારણે વોલ સ્ટ્રીટમાં પાછલા સત્રમાં ભારે ઘટાડો જોવા મળ્યો હતો, જેના કારણે બજારમાં સેન્ટિમેન્ટ નકારાત્મક રહ્યું છે. તેમણે વધુમાં ઉમેર્યું હતું કે જ્યાં સુધી નિફ્ટી 23,950ની નીચે રહેશે ત્યાં સુધી આ જ સેન્ટિમેન્ટ જળવાઈ રહેશે. 

મોટાભાગના વૈશ્વિક બજારોમાં મિશ્ર કારોબાર જોવા મળી રહ્યો છે. ટોક્યો, શાંઘાઈ અને જકાર્તા લાલ નિશાનમાં હતા, જ્યારે હોંગકોંગ, સિઓલ અને બેંગકોક લીલા નિશાનમાં હતા. ટેક શેરોમાં વેચવાલીના કારણે અમેરિકી શેરબજાર પણ મંગળવારે ઘટાડા સાથે બંધ થયું હતું, જેમાં મુખ્ય ઈન્ડેક્સ ડાઉ જોન્સમાં 0.09 ટકા અને ટેકનોલોજી ઈન્ડેક્સ નેસ્ડેકમાં 2.21 ટકાનો મોટો ઘટાડો જોવા મળ્યો હતો.