અમદાવાદમાં કેન્દ્રીય મંત્રી અશ્વિની વૈષ્ણવ: બુલેટ ટ્રેન પ્રોજેક્ટ અને શહેરના 5 મહત્વના વિકાસ કાર્યોને વેગ

કેન્દ્રીય રેલવે, સૂચના અને પ્રસારણ તથા ઇલેક્ટ્રોનિક્સ અને આઈટી મંત્રી અશ્વિની વૈષ્ણવની અમદાવાદ મુલાકાત દરમિયાન શહેરના ઇન્ફ્રાસ્ટ્રક્ચર અને રેલવે વિકાસના વિવિધ પ્રોજેક્ટ્સની સમીક્ષા કરવામાં આવી હતી. અમદાવાદ એરપોર્ટ પર મળેલી આ બેઠકમાં મંત્રીએ શહેરના વિકાસ માટે મહત્વના નિર્ણયો લીધા હતા.

મંત્રીએ માહિતી આપી હતી કે મુંબઈ-અમદાવાદ બુલેટ ટ્રેન પ્રોજેક્ટનું 80 ટકા કામ પૂર્ણ થઈ ચૂક્યું છે. વર્ષ 2027માં સુરત-બિલીમોરા સેક્શન પર પ્રથમ તબક્કાની સેવા શરૂ કરવામાં આવશે, જે બાદ ક્રમશઃ વાપી, અમદાવાદ અને મુંબઈ સુધી તેનું વિસ્તરણ થશે. આ ઉપરાંત, વડાપ્રધાન નરેન્દ્ર મોદી આજે સાણંદ ખાતે દેશના ત્રીજા સેમીકન્ડક્ટર પ્લાન્ટનું ઉદ્ઘાટન કરશે તેમ પણ તેમણે જણાવ્યું હતું.

શહેરના વિકાસ માટે લેવાયેલા પાંચ મુખ્ય નિર્ણયો:

બેઠક દરમિયાન અમદાવાદ શહેરના મહત્વના પ્રોજેક્ટ્સમાં ઝડપ લાવવા માટે નીચે મુજબના નિર્ણયો લેવામાં આવ્યા છે:

1. ઓમનગર અંડરપાસ (ROB): ઓમનગર અંડરપાસનું કામ આગામી નવરાત્રી પહેલા પૂર્ણ કરવા સ્પષ્ટ નિર્દેશ આપવામાં આવ્યા છે, જેથી નાગરિકોને સુવિધા મળે.

2. અસારવા સ્ટેશનનો પુનઃવિકાસ: અસારવા સ્ટેશનને નવા માસ્ટર પ્લાન મુજબ આધુનિક ટર્મિનલ તરીકે વિકસાવવામાં આવશે. જેમાં નવી સ્ટેશન બિલ્ડીંગ અને આધુનિક યાત્રી સુવિધાઓ ઊભી કરાશે.

3. અમદાવાદ સ્ટેશન પર દ્વિતીય પ્રવેશદ્વાર: રેલવે સ્ટેશનના પુનઃવિકાસ હેઠળ સારંગપુર દિશામાં બીજો પ્રવેશદ્વાર અને રોડ કનેક્ટિવિટી વિકસાવવા પર સહમતી સધાઈ છે.

4. શાહપુર-અમદાવાદ ફ્લાયઓવર: આ પ્રોજેક્ટ માટે ભારતીય પુરાતત્વ વિભાગની જરૂરી પરવાનગીઓ મેળવી કામગીરીને વેગ આપવા નિર્ણય લેવાયો છે.

5. સાબરમતી સ્ટેશન રોડનું વિસ્તરણ: સાબરમતી સ્ટેશન પાસે વધુ સારી કનેક્ટિવિટી માટે સ્ટેશન રોડનું વિસ્તરણ કરવામાં આવશે.

આ બેઠકમાં અમદાવાદના મેયર હિતેશ બારોટ, શહેર ભાજપ પ્રમુખ પ્રેરક શાહ, ડેપ્યુટી મેયર અંજુબેન શાહ, સ્ટેન્ડિંગ કમિટીના ચેરમેન કમલેશભાઈ પટેલ સહિતના સ્થાનિક જનપ્રતિનિધિઓ અને પદાધિકારીઓ ઉપસ્થિત રહ્યા હતા.