ઇન્ટરનેશનલ બિગ કેટ એલાયન્સ સમિટ-2026ની પ્રથમ પ્રિ-ઇવેન્ટનો પ્રારંભ

ભુપેન્દ્ર પટેલે ઇન્ટરનેશનલ બિગ કેટ એલાયન્સ (IBCA) સમિટ-2026ની પ્રથમ પ્રિ-ઇવેન્ટનો ગાંધીનગરથી વર્ચ્યુઅલ માધ્યમ દ્વારા પ્રારંભ કરાવ્યો

આ પ્રિ-ઇવેન્ટ સાસણ ગીર ખાતે લાયન કન્ઝર્વેશન વિષય પર યોજાઈ હતી, જેમાં ભુપેન્દ્ર યાદવ, અર્જુન મોઢવાડિયા અને પ્રવિણ માલિ પ્રત્યક્ષ ઉપસ્થિત રહ્યા હતા. પ્રધાનમંત્રી નરેન્દ્ર મોદીની પ્રેરણાથી 1-2 જૂન 2026ના રોજ નવી દિલ્હીમાં IBCAની પ્રથમ સમિટ યોજાશે. આ સમિટના પૂર્વાર્ધરૂપે દેશના વિવિધ શહેરોમાં થીમ આધારિત પ્રિ-ઇવેન્ટ યોજાશે, જેમાં સાસણ (સિંહ), ભોપાલ (ચિતા), ભુવનેશ્વર (દીપડો), ગેંગટોક (હિમ દીપડો) અને ચંદ્રપુર (વાઘ)નો સમાવેશ થાય છે. મુખ્યમંત્રીએ જણાવ્યું કે, એશિયાટિક સિંહના સંરક્ષણ અને સંવર્ધન માટે ગુજરાતે વૈશ્વિક સ્તરે અનોખું મોડલ ઉભું કર્યું છે. 1991માં 284 રહેલા સિંહોની સંખ્યા વધીને આજે 891 સુધી પહોંચી છે, તેમજ તેમનો વિચરણ વિસ્તાર 3 જિલ્લાઓમાંથી વધીને 11 જિલ્લાઓ સુધી વિસ્તર્યો છે. બરડા અભ્યારણ્ય એશિયાટિક સિંહનું નવું રહેઠાણ બની રહ્યું છે, જ્યાં હાલમાં આશરે 24 સિંહ વસવાટ કરે છે.

તેમણે વધુમાં ઉમેર્યું કે “વિકાસ ભી, વિરાસત ભી”ના મંત્રને સાકાર કરતાં વડાપ્રધાનશ્રીએ પ્રોજેક્ટ લાયન શરૂ કર્યો છે, જેમાં બ્રિડિંગ સેન્ટર, આઈસોલેશન સેન્ટર, આધુનિક સારવાર, રેડિયો કોલર અને ડ્રોન સર્વેલન્સ જેવી સુવિધાઓ વિકસાવવામાં આવી છે. કેન્દ્રીય મંત્રી Bhupender Yadav એ જણાવ્યું કે, IBCA સમિટ દ્વારા વિશ્વના 55 દેશોના પ્રતિનિધિઓ, વૈજ્ઞાનિકો અને નિષ્ણાતોને એક મંચ પર લાવી વન્યજીવ સંરક્ષણ માટે વૈશ્વિક સહયોગ મજબૂત બનાવાશે. આ સમિટ દરમિયાન “દિલ્લી ડિકલેરેશન” પણ જાહેર થશે. રાજ્યના વન મંત્રી Arjun Modhwadia એ જણાવ્યું કે, ગુજરાતમાં સિંહ અને દીપડા ઉપરાંત વાઘના કાયમી વસવાટ માટે પણ પ્રયત્નો ચાલી રહ્યા છે અને ચિત્તાને લાવવાની તૈયારી પણ કરવામાં આવી રહી છે.

આ પ્રિ-ઇવેન્ટ દરમિયાન સાસણ ગીરના વન્યજીવ સંવર્ધન પર આધારિત બ્રોશરનું પણ વિમોચન કરવામાં આવ્યું હતું. કાર્યક્રમમાં વન વિભાગના અધિકારીઓ અને નિષ્ણાતો મોટી સંખ્યામાં હાજર રહ્યા હતા. આ રીતે IBCA સમિટ-2026 પ્રકૃતિ, પર્યાવરણ અને વન્યજીવ સંરક્ષણ માટે ભારતનું વૈશ્વિક નેતૃત્વ દર્શાવનાર મહત્વપૂર્ણ મંચ બનશે.