ગાંધીનગરમાં NMSAR બોર્ડની 23મી બેઠક મળી

ગાંધીનગરમાં નેશનલ મેરિટાઈમ સર્ચ એન્ડ રેસ્ક્યુ (NMSAR) બોર્ડની 23મી બેઠક મળી હતી. દરિયાઈ શોધ અને બચાવ (SAR) કામગીરી સંબંધિત તમામ બાબતો માટેનું આ દેશનું સર્વોચ્ચ નિર્ણયકારી અને સંકલન મંચ છે.

ભારત સરકાર દ્વારા 2002માં સ્થાપિત આ બોર્ડ ભારતીય કોસ્ટ ગાર્ડના ડિરેક્ટર જનરલની અધ્યક્ષતામાં કાર્યરત છે. NMSAR બોર્ડનો મુખ્ય હેતુ ભારતીય શોધ અને બચાવ ક્ષેત્ર (ISRR)માં નીતિ ઘડતર, ક્ષમતાવૃદ્ધિ અને વિવિધ એજન્સીઓ વચ્ચે સુમેળ સ્થાપિત કરવાનો છે. ભારતનું SAR ક્ષેત્ર વિશ્વના સૌથી વિશાળ ક્ષેત્રોમાંનું એક છે, જે હિંદ મહાસાગરના આશરે 4.6 મિલિયન ચોરસ કિલોમીટર વિસ્તારને આવરી લે છે.

આ બેઠકમાં ભારતીય નૌકાદળ, વાયુસેના, ડિરેક્ટોરેટ જનરલ ઓફ શિપિંગ, એરપોર્ટ ઓથોરિટી ઓફ ઈન્ડિયા, ભારતીય હવામાન વિભાગ (IMD), ભારતીય રાષ્ટ્રીય મહાસાગર માહિતી સેવાઓ (INCOIS), વિવિધ રાજ્ય મેરીટાઇમ બોર્ડ, બંદર સત્તાવાળાઓ, તેમજ કેન્દ્ર અને રાજ્ય સરકારના વરિષ્ઠ અધિકારીઓ ઉપસ્થિત રહ્યા હતા. વેપારી મરીન, માછીમારી અને ઓફશોર ઉદ્યોગોના પ્રતિનિધિઓએ પણ ભાગ લીધો હતો.

બોર્ડની અધ્યક્ષતા પરમેશ શિવમણી, ચેરપર્સન, NMSARએ કરી હતી. બેઠક દરમિયાન દરિયાઈ દુર્ઘટનાઓ દરમિયાન ઝડપી પ્રતિભાવ, આધુનિક ટેકનોલોજીના ઉપયોગ, તાલીમ અને આંતરરાષ્ટ્રીય સહકારને વધુ મજબૂત બનાવવા અંગે ચર્ચા થઈ. NMSAR બોર્ડ દેશના દરિયાઈ અને એરોનોટિકલ SAR પ્રયાસોને એકીકૃત કરીને મુશ્કેલીની પરિસ્થિતિઓમાં સમયસર અને કાર્યક્ષમ પ્રતિભાવ સુનિશ્ચિત કરવા માટે એક મહત્વપૂર્ણ મંચ તરીકે કાર્ય કરે છે.