પાટણના સૂકાભઠ્ઠ કામલપુર ગામમાં કમાલ: ઇઝરાયેલી બરહી ખારેકની પ્રાકૃતિક ખેતી કરી ખેડૂતે મેળવી 10 લાખ રૂ.ની કમાણી

પાટણના સૂકાભઠ્ઠ કામલપુર ગામમાં કમાલ: ઇઝરાયેલી બરહી ખારેકની પ્રાકૃતિક ખેતી કરી ખેડૂતે મેળવી 10 લાખ રૂ.ની કમાણી

ગુજરાતના સરહદી અને સૂકા વિસ્તાર તરીકે ઓળખાતા પાટણ જિલ્લાના રાધનપુર પંથકમાંથી ખેતીમાં ક્રાંતિ લાવતો એક પ્રેરણાદાયી કિસ્સો સામે આવ્યો છે. રાધનપુર તાલુકાના કામલપુર ગામના એક પ્રગતિશીલ ખેડૂતે ચીલાચાલુ ખેતી છોડીને બાગાયતી અને પ્રાકૃતિક ખેતી અપનાવી છે. ઇઝરાયેલની પ્રખ્યાત 'બરહી' જાતની ખારેકનું મબલખ ઉત્પાદન કરીને આ ખેડૂતે અન્ય ખેડૂતો માટે નવો રાહ ચીંધ્યો છે.

નર્મદાના પાણી અને પ્રાકૃતિક ખેતીનો સમન્વય

એક સમયે પાણીની અછતનો સામનો કરતા કામલપુર ગામમાં આજે નર્મદાના નીર પહોંચ્યા છે. આ સવલતનો યોગ્ય ઉપયોગ કરીને ગામના પ્રગતિશીલ ખેડૂત જેસંગભાઈ ચૌધરીએ પોતાના ખેતરમાં અખતરો કર્યો. તેમણે રાસાયણિક ખાતરોને તિલાંજલિ આપીને સંપૂર્ણપણે પ્રાકૃતિક (ઓર્ગેનિક) પદ્ધતિથી ખેતી શરૂ કરી. જેસંગભાઈએ પોતાના ખેતરમાં:

150 થી વધુ બરહી ખારેકના છોડનું વાવેતર કર્યું છે.

ખારેકની સાથે લીંબુના છોડનું પણ આંતરપાક તરીકે વાવેતર કર્યું છે. આ આધુનિક અને પ્રાકૃતિક ખેતીના સમન્વયથી તેઓ આજે તમામ ખર્ચ બાદ કરીને વર્ષે અંદાજે રૂપિયા 10 લાખની માતબર ઉપજ મેળવી રહ્યા છે.

બાગાયત વિભાગ તરફથી મોટી સબસિડી: છોડ દીઠ ₹1,750 ની સહાય

પાટણ જિલ્લા બાગાયત અધિકારી કિશનસિંહ વાઘેલાએ આ અંગે વિગતો આપતા જણાવ્યું હતું કે, રાધનપુર જેવા સૂકા વિસ્તારમાં હવે ખેડૂતો પરંપરાગત ખેતી છોડીને બાગાયતી ખેતી તરફ વળ્યા છે, જે ખૂબ જ આનંદની વાત છે.

સરકાર પણ આવા પ્રગતિશીલ ખેડૂતોને પ્રોત્સાહન આપી રહી છે. બાગાયત અધિકારીના જણાવ્યા અનુસાર: "સરકાર દ્વારા ખેડૂતોને પ્રોત્સાહિત કરવા માટે ટિસ્યુ કલ્ચર (Tissue Culture) પદ્ધતિના એક છોડ દીઠ રૂપિયા 1,750 ની સહાય આપવામાં આવે છે."

કેમ ખાસ છે આ ઇઝરાયેલી બરહી 

સ્વાદમાં ઉત્તમ: બરહી ખારેક કાચી (પીળી) હોય ત્યારે પણ ખાવામાં અત્યંત મીઠી અને સ્વાદિષ્ટ લાગે છે, જેના કારણે બજારમાં તેની માંગ ખૂબ ઊંચી રહે છે.

ઓછા પાણીમાં વધુ ઉત્પાદન: આ પાક સૂકા અને અર્ધ-સૂકા વિસ્તાર માટે અનુકૂળ છે. ટપક સિંચાઈ પદ્ધતિ દ્વારા ખૂબ જ ઓછા પાણીમાં આનું મબલખ ઉત્પાદન લઈ શકાય છે.

લાંબાગાળાની આવક: ખારેકનો છોડ એકવાર મોટો થયા પછી વર્ષો સુધી સતત અને અધધ કમાણી આપતો રહે છે.

જેસંગભાઈ ચૌધરીની આ સફળતા આજે આજુબાજુના વિસ્તારના અન્ય ખેડૂતો માટે પણ પ્રેરણા સ્ત્રોત બની છે અને રાધનપુર પંથક હવે બાગાયતી ખેતીનું નવું હબ બની રહ્યું છે.