ટીબી મુક્ત ગુજરાત તરફ: દાંતા તાલુકામાં ટ્રુ નેટ મશીનનું લોકાર્પણ

ટીબી મુક્ત ગુજરાત તરફ: દાંતા તાલુકામાં ટ્રુ નેટ મશીનનું લોકાર્પણ

ગુજરાતના મહત્તમ આદિવાસી વિસ્તાર ગણાતા દાંતા તાલુકામાં આદિવાસી સમુદાયમાં ટીબી (Tuberculosis) ના દર્દીઓની સંખ્યા વધુ જોવા મળી રહી છે. આ ગંભીર પરિસ્થિતિને ધ્યાનમાં રાખીને, દાંતા તાલુકા આરોગ્ય વિભાગ દ્વારા ટીબીને જડમૂળથી નાબૂદ કરવા માટે એક સઘન ઝુંબેશ શરૂ કરવામાં આવી છે.

ડોર-ટુ-ડોર સર્વે અને નિદાનની કામગીરી

તાલુકા આરોગ્ય વિભાગની વિવિધ ટીમો દ્વારા હાલમાં ડોર-ટુ-ડોર જઈને ટીબીના દર્દીઓનો સર્વે કરવામાં આવી રહ્યો છે. આ કામગીરી હેઠળ શંકાસ્પદ જણાતા દર્દીઓને સ્થળ પર જ પ્રાથમિક દવા આપવામાં આવે છે અને તેમને વધુ નિદાન તથા એક્સ-રે માટે અંબાજીની સબ ડિસ્ટ્રિક્ટ હોસ્પિટલમાં લાવવામાં આવે છે.

ટ્રુ નેટ મશીનનું લોકાર્પણ: સચોટ નિદાન શક્ય બન્યું

ટીબીના દર્દીઓને સચોટ અને ઝડપી ઇલાજ મળી રહે તે માટે એક મોટું પગલું લેવામાં આવ્યું છે. રાજ્ય સરકારના "24 વર્ષ જનવિશ્વાસ, સેવા અને સમર્પણ"ના ભાગરૂપે, અંબાજીની આદ્યશક્તિ જનરલ હોસ્પિટલ ખાતે 'ટ્રુ નેટ' (True Nat) મશીનનું લોકાર્પણ કરવામાં આવ્યું છે.

આ ટ્રુ નેટ મશીન ટીબીના દર્દીઓનું સચોટ નિદાન કરી શકશે. એટલું જ નહીં, આ મશીન દ્વારા દર્દીમાં ટીબી કયા સ્ટેજમાં છે અને ચાલતી દવા કેટલી અસરકારક છે, તેનો રિપોર્ટ પણ તાત્કાલિક જાણી શકાશે, જેનાથી સારવાર વધુ અસરકારક બનશે.

બનાસકાંઠા જિલ્લાને 15 મશીનની ફાળવણી

આ અંગે માહિતી આપતા જિલ્લાના ટીબી અધિકારીએ જણાવ્યું હતું કે, સરકારના વિકાસ સપ્તાહની ઉજવણીના ભાગરૂપે રૂપિયા 17 લાખની કિંમતના એક એવા કુલ 15ટ્રુ નેટ મશીનોની બનાસકાંઠા જિલ્લાને ફાળવણી કરવામાં આવી છે. તેમણે વિશ્વાસ વ્યક્ત કર્યો કે, આ મશીનોની મદદથી માત્ર દાંતા તાલુકો જ નહીં, પરંતુ સમગ્ર બનાસકાંઠા જિલ્લામાંથી ટીબીને નિર્મૂલ કરવા માટે અસરકારક પરિણામ મળશે.

લોકાર્પણ પ્રસંગે હોસ્પિટલમાં ઉપસ્થિત અન્ય દર્દીઓને પણ ટીબી જેવા રોગો અંગે માર્ગદર્શન આપીને આ રોગને ડામવા માટે સહકાર આપવા અપીલ કરવામાં આવી હતી.