અમેરિકામાં ભારતીય દૂતાવાસના મેંગો ટેસ્ટિંગ કાર્યક્રમમાં ૮૦૦૦થી વધુ લોકો ઉમટ્યા

અમેરિકામાં ભારતના રાજદૂત વિનય મોહન ક્વાત્રાએ જણાવ્યું હતું કે દૂતાવાસને લગભગ ૮,૦૦૦ લોકોની હાજરીની અપેક્ષા હતી, પરંતુ વાસ્તવિક સંખ્યા અપેક્ષા કરતાં ઘણી વધારે હતી.

એએનઆઈ (ANI) સાથે વાત કરતા, ક્વાત્રાએ કહ્યું કે ભારતીય કેરી હવે અમેરિકન ગ્રાહકોની પસંદગીમાં "મજબૂતીથી અને સંપૂર્ણપણે વણાઈ" ગઈ છે. તેમણે વધુમાં કહ્યું, “જુઓ, આ ખરેખર મેંગો ડિપ્લોમસી નથી. આ ભારતનો સ્વાદ છે, જેનો એક નાનકડો અંશ અમે અહીં રજૂ કરવાનો પ્રયાસ કર્યો છે. અમને અપેક્ષા હતી કે ૮,૦૦૦ લોકો આવશે. આ દર્શાવે છે કે કેરી હવે અમેરિકનોની જીભ પર ચડી ગઈ છે.” તેમણે ઉમેર્યું કે, “માત્ર કેરી જ નહીં, અમે બાસમતી ચોખા, ભારતીય ચા અને કોફીનું પણ પ્રમોશન કરી રહ્યા છીએ. અહીં પ્રથમ વખત ઓલિવ ટી જેવી ચીજો પણ રજૂ કરવામાં આવી છે. લોકો આ કાર્યક્રમનો ખૂબ આનંદ માણી રહ્યા છે.”

રાજદૂત ક્વાત્રાએ જણાવ્યું હતું કે આ જબરદસ્ત પ્રતિસાદ સૂચવે છે કે આવા કાર્યક્રમો વર્ષમાં એકવારને બદલે વધુ વખત આયોજિત કરવા જોઈએ. તેમણે કહ્યું કે, “આ અમારા માટે એક સંદેશ છે કે આપણે વર્ષમાં એક કરતા વધુ વખત આવા કાર્યક્રમો કરવા જોઈએ. આપણે પ્રદર્શન માટેની પ્રોડક્ટ્સની શ્રેણી પણ વધારવાની જરૂર છે.”

ભારતીય દૂતાવાસે શનિવારે (સ્થાનિક સમય મુજબ) ‘ટેસ્ટ ધ ટ્રોપિકલ મેજિક’નું આયોજન કર્યું હતું, જેમાં મુલાકાતીઓ માટે ભારતની પ્રખ્યાત કેરીની જાતો ચાખવાની મફત વ્યવસ્થા કરવામાં આવી હતી.