અમેરિકામાં વિમાન દુર્ઘટના, માયામીમાં એમેઝોનનું કાર્ગો પ્લેન રનવે પરથી લપસતાં 5નાં મોત

અમેરિકાના ફ્લોરિડા રાજ્યમાં આવેલ માયામી ઇન્ટરનેશનલ એરપોર્ટ પર એક મોટી વિમાન દુર્ઘટના સર્જાઈ છે. પ્યુઅર્ટો રિકોના સાન જુઆનથી આવેલું એમેઝોનનું બોઇંગ 767-300 કાર્ગો પ્લેન લેન્ડિંગ સમયે રનવે પરથી લપસી જતાં ક્રેશ થયું હતું. આ ભયાનક અકસ્માતમાં 5 લોકોના મોત થયા છે, જ્યારે અન્ય 5 લોકો ગંભીર રીતે ઇજાગ્રસ્ત થયા છે.

માયામી-ડેડ કાઉન્ટીના શેરિફ રોઝી કોર્ડેરો-સ્ટુટ્ઝના જણાવ્યા અનુસાર, આ અકસ્માત રવિવારે સ્થાનિક સમય મુજબ બપોરે 1:58 વાગ્યે થયો હતો. ઘટનાને પગલે એરપોર્ટ પર અફરાતફરી મચી ગઈ હતી અને આકાશમાં કાળા ડિબંગ ધુમાડાના ગોટેગોટા ઉડતા જોવા મળ્યા હતા. માયામી-ડેડ ફાયર રેસ્ક્યૂના 60થી વધુ યુનિટ્સ અને લગભગ 200 ફાયર ફાઇટર્સે તાત્કાલિક ઘટનાસ્થળે પહોંચી રેસ્ક્યૂ કામગીરી હાથ ધરી હતી. .

કેલિફોર્નિયાના ફ્રેસ્નોમાં નાનું વિમાન ક્રેશ, 2 બાળકોના મોત
અન્ય એક દુર્ઘટનામાં, કેલિફોર્નિયાના ફ્રેસ્નો શહેરમાં શનિવારે એક સિંગલ-એન્જિન નાનું વિમાન સેન જોઆક્વિન નદીના કાંઠે ક્રેશ થઈ ગયું હતું. આ વિમાનમાં કુલ ચાર લોકો સવાર હતા. ઘટનાસ્થળે જ 2 બાળકોના કરૂણ મોત નીપજ્યા હતા, જ્યારે ગંભીર રીતે દાઝી ગયેલા 2 વયસ્કોને હોસ્પિટલમાં દાખલ કરવામાં આવ્યા છે. ફાયર બ્રિગેડે સમયસર આગ પર કાબૂ મેળવતાં નજીકના ઘરો સુધી આગ ફેલાતા અટકી હતી.