કેન્દ્રીય મંત્રી પિયુષ ગોયલે ભારત-જાપાન આર્થિક ભાગીદારીને મજબૂત બનાવવા પર ભાર મૂક્યો

મંત્રી પીયૂષ ગોયલ તારીખ 27 ઓગસ્ટ સુધી જાપાનની મુલાકાતે છે... આ દરમિયાન તેઓ ટોક્યો, નાગોયા અને ઓસાકાની મુલાકાત લેશે...

કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે જાપાનની મુલાકાતે છે... તેમણે તેમની સત્તાવાર મુલાકાતની શરૂઆત અગ્રણી જાપાની કંપનીઓના CEO અને બિઝનેસ લીડર્સ સાથેની બેઠકો સાથે કરી, જ્યાં તેમણે ભારત-જાપાન આર્થિક ભાગીદારીને વધુ મજબૂત બનાવવાની શક્યતાઓ પર ચર્ચા કરી. મંત્રી પીયૂષ ગોયલ તારીખ 27 ઓગસ્ટ સુધી જાપાનની મુલાકાતે છે. તેઓ ટોક્યો, નાગોયા અને ઓસાકાની મુલાકાત લેશે. તેઓ ભારતના અત્યાર સુધીના સૌથી મોટા વ્યાપારી પ્રતિનિધિમંડળનું નેતૃત્વ કરી રહ્યા છે, જેમાં 200થી વધુ વ્યાપારી પ્રતિનિધિઓનો સમાવેશ થાય છે.

પીયૂષ ગોયલે સોશિયલ મીડિયા પ્લેટફોર્મ X પર શેર કર્યું કે, તેઓ ટોક્યોમાં સુમિટોમો કોર્પોરેશનના પ્રમુખ અને CEO શિંગો યુનો સાથે મળ્યા હતા. બંનેએ ઉર્જા સંક્રમણ, ગતિશીલતા અને ઔદ્યોગિક માળખા સહિત વિવિધ ક્ષેત્રોમાં ભારતમાં કંપનીની સંડોવણીને વધુ વિસ્તૃત કરવાની તકો પર ચર્ચા કરી... ગોયલે કહ્યું હતું કે, ભારતનો રોકાણ-આધારિત આર્થિક વિકાસ અને ઝડપથી વિસ્તરતું ઉત્પાદન ક્ષેત્ર ભારત-જાપાન સહયોગને વધારવા માટે પુષ્કળ તકો પ્રદાન કરે છે, જે બંને દેશો વચ્ચે આર્થિક ભાગીદારીને વધુ મજબૂત બનાવી શકે છે... તેમણે મેઇજી સેઇકા ફાર્મા કંપની લિમિટેડના પ્રમુખ અને પ્રતિનિધિ નિર્દેશક તોશિયાકી નાગાસાતોને પણ મળ્યા. આ બેઠકમાં ફાર્માસ્યુટિકલ ક્ષેત્રમાં ભારત-જાપાન સહયોગને મજબૂત બનાવવા અને ભારતમાં કંપનીના ઉત્પાદન-સંશોધન અને વિકાસ (R&D) આધારને વિસ્તૃત કરવાની શક્યતાઓ પર ચર્ચા કરવામાં આવી હતી.

કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે કહ્યું હતું કે, ભારતનું ફાર્માસ્યુટિકલ ઇકોસિસ્ટમ જાપાની કંપનીઓને તેમના વ્યવસાયોને વિસ્તૃત કરવા અને લાંબા ગાળાની વૃદ્ધિ પ્રાપ્ત કરવા માટે નોંધપાત્ર તકો પ્રદાન કરે છે.

200થી વધુ વ્યવસાયિક પ્રતિનિધિઓએ હાજરી આપી

સત્તાવાર નિવેદન અનુસાર, ભારતીય વ્યાપાર પ્રતિનિધિમંડળમાં ઉત્પાદન, સેમિકન્ડક્ટર, સ્વચ્છ ઉર્જા, સ્ટીલ, ઓટોમોબાઇલ્સ, નાણાકીય સેવાઓ, આરોગ્યસંભાળ અને સ્ટાર્ટઅપ્સ સહિત વિવિધ ક્ષેત્રોના 200થી વધુ પ્રતિનિધિઓનો સમાવેશ થાય છે... આ મુલાકાત એવા સમયે થઈ રહી છે, જ્યારે ભારત અને જાપાન તેમની ખાસ વ્યૂહાત્મક અને વૈશ્વિક ભાગીદારી હેઠળ વેપાર અને રોકાણ સંબંધોને વધુ ગાઢ બનાવવા માટે કામ કરી રહ્યા છે .... ટોક્યોમાં, પીયૂષ ગોયલ મુખ્ય જાપાની વ્યાપાર જૂથો અને ઔદ્યોગિક કંપનીઓના ટોચના નેતૃત્વ સાથે શ્રેણીબદ્ધ બેઠકો કરશે, જેમણે ભારતના વિકાસમાં લાંબા સમયથી યોગદાન આપ્યું છે.... તેઓ જાપાન બિઝનેસ ફેડરેશન  Keidanren સાથે રાઉન્ડ ટેબલ મીટિંગમાં પણ ભાગ લેશે , જે જાપાનનું અગ્રણી બિઝનેસ એસોસિએશન છે જે 1500થી વધુ મોટી જાપાની કંપનીઓનું પ્રતિનિધિત્વ કરે છે.

મુલાકાત દરમિયાન સેમિકન્ડક્ટર અને આર્ટિફિશિયલ ઇન્ટેલિજન્સ, સ્ટાર્ટઅપ્સ અને વિદેશી સંસ્થાકીય રોકાણકારો સાથે જોડાણ પર વિશેષ સત્રો પણ યોજાશે, જેનો ઉદ્દેશ્ય ભારતને રોકાણ અને નવીનતા માટે એક મુખ્ય કેન્દ્ર તરીકે સ્થાન આપવાનો છે.

ઓસાકામાં રોકાણ અને વ્યાપાર રોડ શો

કેન્દ્રીય વાણિજ્ય અને ઉદ્યોગ મંત્રી પીયૂષ ગોયલની જાપાન મુલાકાત ઓસાકામાં રોકાણકારો અને વ્યાપાર રોડ શો સાથે સમાપ્ત થશે , જ્યાં તેઓ ઇલેક્ટ્રોનિક્સ, ઔદ્યોગિક અને ગ્રાહક ક્ષેત્રોમાં અગ્રણી જાપાની કંપનીઓ સાથે પણ મુલાકાત કરશે...આ બેઠકો ભારતના ઉત્પાદન, સ્વચ્છ ઉર્જા અને ગ્રાહક બજારોમાં ઉપલબ્ધ રોકાણ અને વ્યવસાયની તકો પર પ્રકાશ પાડશે.