જર્મનીમાં ગીસેન શહેરમાં એરિટ્રિયા ઉત્સવમાં 26 પોલીસ અધિકારીઓ ઘાયલ

જર્મનીમાં ગીસેન  શહેરમાં યોજાયેલા એરિટ્રિયા ઉત્સવ સામે કેટલાક લોકો વિરોધ કરી રહ્યા હતા. આ વિરોધને ડામવાના પ્રયાસમાં 26 પોલીસ અધિકારીઓ ઘાયલ થયા હતા. વિરોધીઓ આ ઉત્સવને એરિટ્રીયન શાસન દ્વારા રચાયેલું ષડયંત્ર માની રહ્યા છે. જર્મન પોલીસ અધિકારીઓએ એરિટ્રિયન સાંસ્કૃતિક ઉત્સવને લક્ષ્યાંક બનાવતા ટોળાને ડામવા માટે લાકડીઓ અને મરીના સ્પ્રેનો ઉપયોગ કર્યો હતો.

એક પોલીસ નિવેદનમાં કહેવામાં આવ્યું છે કે શનિવારે કલાકો સુધી અથડામણ થઈ હતી, જેમાં 26 પોલીસ અધિકારીઓ ઘાયલ થયા હતા. દેખાવકારોએ પોલીસ પર બોટલો અને પથ્થરો ફેંક્યા હતા, જ્યારે કેટલાક વાહનોને નુકસાન પહોંચાડ્યું હતું અને તહેવારના સ્થળની આસપાસની ફેન્સીંગ તોડી નાખી. તેઓએ તહેવારમાં સહભાગીઓને લઈ જતી બસો પર પણ પથ્થરમારો કર્યો હતો. પોલીસે લગભગ 100 લોકોની ધરપકડ કરી હતી અને ટાઉન સેન્ટરમાં ટ્રાફિકને અટકાવવો પડ્યો હતો.

ઉલ્લેખનીય છે કે જર્મનીમાં સેન્ટ્રલ કાઉન્સિલ ફોર એરિટ્રિઅન્સ દ્વારા આ ફેસ્ટિવલનું આયોજન કરવામાં આવ્યું હતું. તાજેતરના વર્ષોમાં, જર્મનીએ ઘણા એરિટ્રિયનોને આશ્રય આપ્યો છે જે યુરોપિયન યુનિયનમાં સ્થાયી થવા માંગતા આફ્રિકન સ્થળાંતર કરનારાઓના સૌથી મોટા જૂથોમાંનું એક છે.