પાકિસ્તાન બાર કાઉન્સિલે 9 મે 2024 ના રોજ દેશવ્યાપી હડતાળનું એલાન કર્યું

મોલ રોડ પોલીસ અને વકીલો વચ્ચે યુદ્ધનું મેદાન બની ગયો હતો

પાકિસ્તાનના પંજાબ પ્રાંતમાં એક કોર્ટની બહાર પોલીસ અને વકીલો વચ્ચે થયેલી હિંસક અથડામણમાં 25 થી વધુ લોકો ઘાયલ થયા છે. આ ઘટના બાદ પોલીસે 50 વકીલોની ધરપકડ કરી છે અને તેના વિરોધમાં બાર કાઉન્સિલે 9 મે 2024 ના રોજ દેશવ્યાપી હડતાળનું એલાન કર્યું છે.

અહીંના મોલ રોડ પર લાહોર હાઈકોર્ટ (LHC) માં જેલમાં બંધ પૂર્વ વડાપ્રધાન ઈમરાન ખાનની પાકિસ્તાન તહરીક-એ-ઈન્સાફ (PTI) પાર્ટી સાથે સંકળાયેલા વકીલો સામે આતંકવાદના કેસ નોંધવા અને ગૌણ અદાલતને અન્ય સ્થળે ખસેડવાના મુદ્દે બહાર વકીલો અને પોલીસ વચ્ચે ઘર્ષણ થયું હતું. 

મોલ રોડ પોલીસ અને વકીલો વચ્ચે યુદ્ધનું મેદાન બની ગયો હતો. પોલીસે વિરોધ કરી રહેલા વકીલો પર લાઠીચાર્જ કર્યો, ટીયર ગેસના શેલ છોડ્યા અને તેમને વિખેરવા માટે વોટર કેનનનો ઉપયોગ કર્યો. પંજાબ પોલીસે 50 થી વધુ વકીલોની ધરપકડ કરવાનો દાવો કર્યા પછી તરત જ પાકિસ્તાન બાર કાઉન્સિલે પંજાબ પોલીસની કથિત નિર્દયતા વિરુદ્ધ 9 મે 2024 ના રોજ દેશવ્યાપી હડતાળની જાહેરાત કરી છે. 

અથડામણ દરમિયાન બે ડઝનથી વધુ વકીલો અને પોલીસકર્મીઓ ઘાયલ થયા હતા. લાહોરના વરિષ્ઠ પોલીસ અધિકારી કામરાન ફૈઝલે જણાવ્યું કે ઘાયલોમાં ઓછામાં ઓછા 14 પોલીસકર્મીઓનો સમાવેશ થાય છે, જેમાં બે વરિષ્ઠ અધિકારીઓનો પણ સમાવેશ થાય છે, જેમને હોસ્પિટલમાં લઈ જવામાં આવ્યા હતા.

ફૈસલે દાવો કર્યો કે વકીલોએ પહેલા પોલીસ પર પથ્થરમારો કર્યો અને જવાબમાં તેમને વિખેરવા માટે ટીયર ગેસના શેલ અને વોટર કેનનનો ઉપયોગ કરવામાં આવ્યો. બંને પક્ષો વચ્ચે અથડામણ ચાલુ હોવાથી, પંજાબના પ્રથમ મહિલા મુખ્ય પ્રધાન મરિયમ નવાઝે પોલીસ મહાનિરીક્ષક ડૉ. ઉસ્માન અનવરને વકીલો સામે બળનો ઉપયોગ કરવાનું ટાળવા નિર્દેશ કર્યો હતો.