બોસ્ટનમાં ત્રિરંગો લહેરાયો, INS સુદર્શિનીએ સેઇલ્સની ગ્રાન્ડ પરેડમાં ભારતનું પ્રતિનિધિત્વ કર્યું

જહાજે સેઇલ બોસ્ટન 2026ની શરૂઆત નિમિત્તે આયોજિત ગ્રાન્ડ પરેડ ઓફ સેઇલ્સમાં ભાગ લઈને આંતરરાષ્ટ્રીય મંચ પર ભારતનું પ્રતિનિધિત્વ કર્યું...

ભારતીય નૌકાદળનું સેઇલ તાલીમ જહાજ INS સુદર્શિની USAના બોસ્ટન પહોંચી ગયું... આ જહાજે સેઇલ બોસ્ટન 2026ની શરૂઆત નિમિત્તે આયોજિત ગ્રાન્ડ પરેડ ઓફ સેઇલ્સમાં ભાગ લઈને આંતરરાષ્ટ્રીય મંચ પર ભારતનું પ્રતિનિધિત્વ કર્યું હતું.

ભારતીય નૌકાદળનું કહેવું છે કે, લોકાયણ 2026 ટ્રાન્સઓસેનિક અભિયાનના ભાગરૂપે INS સુદર્શિની 12 જુલાઈના રોજ ન્યૂયોર્કમાં આયોજિત Sail4th 250 ઉજવણીમાં સફળ ભાગ લીધા બાદ બોસ્ટન આવ્યું હતું... આ જહાજ ઔપચારિક રીતે કાસલ આઇલેન્ડ અને સીપોર્ટ ડિસ્ટ્રિક્ટ જેવા મુખ્ય સ્થળો પર ભારતીય ત્રિરંગો લહેરાવતા બોસ્ટનમાં પ્રવેશ્યું અને બાદમાં બોસ્ટન ફિશ પિયર પર ડોક કર્યું. આ દરમિયાન, બોસ્ટનમાં ભારતના કોન્સ્યુલ જનરલ, રઘુરામ શાસ્ત્રી પણ સેઇલ્સની ગ્રાન્ડ પરેડ દરમિયાન INS સુદર્શિનીમાં હતા.

સેઇલ બોસ્ટન 2026માં 20થી વધુ દેશોના 60થી વધુ પરંપરાગત સઢવાળી જહાજો ભાગ લઈ રહ્યા છે. આ આંતરરાષ્ટ્રીય કાર્યક્રમમાં INS સુદર્શિની ભારતના દરિયાઈ વારસા, નૌકાદળ રાજદ્વારી અને વૈશ્વિક સદ્ભાવનાનું પ્રતિનિધિત્વ કરી રહી છે.

ભારતીય નૌકાદળનું કહેવું છે કે, આ જહાજ 12થી 15 જુલાઈ સુધી જાહેર જનતા માટે ખુલ્લું રહેશે, જ્યાં મુલાકાતીઓ ભારતીય નૌકાદળની દરિયાઈ પરંપરાઓ અને જહાજની વિશેષતાઓનું નજીકથી અવલોકન કરી શકશે.

INS સુદર્શિનીએ અગાઉ નોર્ફોક, બાલ્ટીમોર અને ન્યૂયોર્કની સફળ મુલાકાતો કરી છે. નૌકાદળનું કહેવું છે કે, સેઇલ બોસ્ટન 2026માં તેની ભાગીદારી ભારત અને યુનાઇટેડ સ્ટેટ્સ વચ્ચે વધતી જતી દરિયાઈ ભાગીદારીને વધુ મજબૂત બનાવશે અને વિશ્વ મંચ પર ભારતના સમૃદ્ધ દરિયાઈ વારસાને પ્રદર્શિત કરશે.