ભારતે ઈરાનના ચાબહાર પોર્ટના સંચાલન માટે ઈરાન સાથે 10 વર્ષના કરાર પર હસ્તાક્ષર કર્યા

આ કરાર ઈન્ડિયા પોર્ટ ગ્લોબલ લિમિટેડ (IPGL) અને ઈરાનના પોર્ટ્સ એન્ડ મેરીટાઇમ ઓર્ગેનાઈઝેશન વચ્ચે કરવામાં આવ્યો છે. આ મહત્વપૂર્ણ સમજૂતી બાદ હવે ઈરાનનું ચાબહાર પોર્ટ આગામી દસ વર્ષ માટે ભારતનું બની ગયું છે. ભારતનું આ પગલું દેશને મધ્ય એશિયા સાથે વેપાર વધારવામાં મદદ કરશે.

કેન્દ્રીય બંદરો, શિપિંગ અને જળમાર્ગ મંત્રાલયે એક નિવેદન જાહેર કરીને જણાવ્યું હતું કે, કેન્દ્રીય મંત્રી સર્બાનંદ સોનોવાલે સોમવારે (13 મે 2024) ઈરાનના ચાબહારની મુલાકાત લીધી હતી અને શાહિદ બેહેશ્તી પોર્ટ ટર્મિનલના વિકાસ માટે લાંબા ગાળાના મુખ્ય કરાર પર હસ્તાક્ષર સમારંભના સાક્ષી બન્યા હતા. 

કેન્દ્રીય મંત્રીએ ઈરાનના માર્ગ અને શહેરી વિકાસ મંત્રી મેહરદાદ બજરાપશ સાથે દ્વિપક્ષીય બેઠક યોજી હતી. બંને મંત્રીઓએ કનેક્ટિવિટી પહેલમાં દ્વિપક્ષીય સહયોગને વધુ મજબૂત કરવા અને ચાબહાર પોર્ટને પ્રાદેશિક કનેક્ટિવિટી હબ બનાવવા માટે તેમના નેતાઓના સહિયારા વિઝનને યાદ કર્યું.

ઉલ્લેખનીય છે કે, આ કરાર ઈન્ડિયા પોર્ટ ગ્લોબલ લિમિટેડ (IPGL) અને ઈરાનના પોર્ટ્સ એન્ડ મેરીટાઇમ ઓર્ગેનાઈઝેશન વચ્ચે થયો હતો. આ મંત્રી સ્તરીય મુલાકાત અને લાંબા ગાળાના કરાર પર હસ્તાક્ષર બંને દેશો વચ્ચેના સંબંધોને વધુ મજબૂત બનાવશે અને અફઘાનિસ્તાન અને વ્યાપક મધ્ય એશિયાના દેશો સાથે વેપારના પ્રવેશદ્વાર તરીકે ચાબહારના મહત્વને પણ પ્રકાશિત કરશે.

ચાબહાર પોર્ટ પ્રોજેક્ટ, ભારત-ઈરાનનો મુખ્ય પ્રોજેક્ટ

ચાબહાર પોર્ટ પ્રોજેક્ટનો વિકાસ એ ભારત-ઈરાનનો મોટો પ્રોજેક્ટ છે. ઈરાનમાં ચાબહાર બંદર એ પ્રદેશ અને ખાસ કરીને મધ્ય એશિયા માટેનું વ્યાપારી પરિવહન કેન્દ્ર છે. INSTC ઈરાનના ચાબહારના વાઈબ્રન્ટ શાહિદ બેહેશ્તી બંદર દ્વારા મલ્ટી મોડલ લોજિસ્ટિક્સ કોરિડોરનો ઉપયોગ કરીને બે બજારોને જોડશે, ત્યાંથી લોજિસ્ટિક્સ ખર્ચને તર્કસંગત બનાવશે, જે બંને પ્રદેશો વચ્ચેના વેપાર વોલ્યુમમાં ફાળો આપશે. વાસ્તવમાં ભારત, ઈરાન અને અફઘાનિસ્તાન વચ્ચે પરિવહન વેપારના હબ તરીકે સ્થિત આ બંદર પરંપરાગત સિલ્ક રોડ માટે વૈકલ્પિક માર્ગ પૂરો પાડે છે. આ બંદર વેપાર અને રોકાણની તકો ખોલશે અને ભારતના આર્થિક વિકાસને વેગ આપશે.

લોજિસ્ટિક્સ નેટવર્કમાં સુધારો થશે

ઉલ્લેખનીય છે કે, ચાબહાર બંદર સમૃદ્ધ મધ્ય એશિયાઈ વિસ્તારને દક્ષિણ એશિયાના બજારો સાથે જોડે છે. તે વેપાર, આર્થિક સહયોગ અને બે ભૌગોલિક પ્રદેશો વચ્ચેના લોકોને જોડવા માટે મહત્વપૂર્ણ તરીકે ઉભરી આવ્યું છે. મધ્ય એશિયાના બજારોની સંભવિતતાને કારણે, ભારતની આગેવાની હેઠળની કનેક્ટિવિટીએ હિંદ મહાસાગર વિસ્તારમાં પ્રવેશને મધ્ય એશિયાના દેશો માટે સુરક્ષિત અને વ્યાપારી રીતે સક્ષમ બનાવ્યો છે. આ કનેક્ટિવિટી માત્ર પરસ્પર જોડાણ પ્રદાન કરશે નહીં, પરંતુ ભારતના સાંસ્કૃતિક અને રાજકીય સંબંધોને આગળ વધારતા રોકાણને પણ પ્રોત્સાહન આપશે.