વિદેશ મંત્રી એસ. જયશંકરનો મંગોલિયા પ્રવાસ: રાષ્ટ્રપતિ અને સંસદના અધ્યક્ષને મળ્યા

ભારતના વિદેશ મંત્રી એસ. જયશંકરે તેમની બે દિવસીય (22-23 જૂન 2026) મંગોલિયા મુલાકાત દરમિયાન તેમના સમકક્ષ બી. બત્સેત્સેગ અને રાષ્ટ્રપતિ ખુરેલસુખ ઉખના સાથે દ્વિપક્ષીય સંબંધો સહિત વૈશ્વિક મુદ્દાઓ પર ગહન ચર્ચાઓ કરી હતી. આ મુલાકાત બત્સેત્સેગના આમંત્રણ પર થઈ હતી.

વિદેશ મંત્રાલયે મંગળવારે એક નિવેદન બહાર પાડીને મુલાકાતના મહત્વના તબક્કાઓની જાણકારી આપી હતી. તેમણે જણાવ્યું હતું કે મુલાકાત દરમિયાન વિદેશ મંત્રીએ મંગોલિયાના વિદેશ મંત્રી અને કેબિનેટ સચિવાલયના વડા બી. એન્ખબાયર સાથે વિગતવાર વાતચીત કરી હતી. તેમણે મંગોલિયાના રાષ્ટ્રપતિ ખુરેલસુખ ઉખના સાથે શિષ્ટાચાર મુલાકાત કરી હતી, સાથે જ સંસદના અધ્યક્ષ એસ. બ્યામ્બાસોગ્ત અને શિક્ષણ મંત્રી એલ. એન્ખ-અમગાલન સાથે પણ મુલાકાત કરી હતી. 

આ દરમિયાન બંને પક્ષોએ ઓક્ટોબર 2025માં મંગોલિયાના રાષ્ટ્રપતિની ભારત મુલાકાત બાદ દ્વિપક્ષીય સંબંધોમાં થયેલી પ્રગતિની સમીક્ષા કરી હતી અને ભારત-મંગોલિયા વ્યૂહાત્મક ભાગીદારીને વધુ મજબૂત કરવા પર ચર્ચા કરી હતી. વાટાઘાટોમાં વિકાસલક્ષી ભાગીદારી, વેપાર, શિક્ષણ, સંસ્કૃતિ, ક્ષમતા નિર્માણ, સપ્લાય ચેઈન, ખાણકામ અને મહત્વપૂર્ણ ખનિજો, સંરક્ષણ, હવાઈ જોડાણ અને પીપલ-ટુ-પીપલ (લોકો વચ્ચેના) સંબંધો જેવા ક્ષેત્રોમાં સહયોગ વધારવા પર સહમતિ બની હતી. બંને દેશોએ પ્રાદેશિક અને વૈશ્વિક મુદ્દાઓ પર પણ વિચારોનું આદાન-પ્રદાન કર્યું હતું. 

વિદેશ મંત્રીએ મંગોલિયાના અલ્તાનશિરી (દોનોગોવી પ્રાંત)માં ભારતના સહયોગથી બની રહેલા તેલ રિફાઇનરી પ્રોજેક્ટ સ્થળની પણ મુલાકાત લીધી હતી, જ્યાં તેમને પ્રોજેક્ટની પ્રગતિ વિશે જાણકારી આપવામાં આવી હતી. આ મુલાકાત મંગોલિયાના વિદેશ મંત્રી અને ઉદ્યોગ તેમજ ખનિજ સંસાધન મંત્રી ગોંગોર દામદિન્યામની સાથે થઈ હતી. વિદેશ મંત્રી એસ. જયશંકરે સોશિયલ મીડિયા પ્લેટફોર્મ X પર લખ્યું હતું કે, "વિદેશ મંત્રી બત્સેત્સેગ બટમુંખ અને ઉદ્યોગ તેમજ ખાણકામ મંત્રી ગોંગોર દમદિન્યામ સાથે મંગોલ રિફાઇનરી પ્રોજેક્ટની કન્સ્ટ્રક્શન સાઇટની મુલાકાત લીધી. આ લેન્ડમાર્ક ભારત મંગોલિયા ફ્રેન્ડશિપ પ્રોજેક્ટ સતત આગળ વધી રહ્યો છે. આમાં સામેલ અલગ-અલગ ટીમો સાથે ચાલી રહેલા કામોની સ્થિતિની સમીક્ષા કરી." 

આ ઉપરાંત, તેમણે ઉલાનબતાર સ્થિત ગંડનતેગચિનલેન મઠની પણ મુલાકાત લીધી હતી, જે સાંસ્કૃતિક અને આધ્યાત્મિક દૃષ્ટિએ એક મહત્વપૂર્ણ સ્થળ છે. જેના વિશે તેમણે X પર લખ્યું હતું, "ઉલાનબતાર સ્થિત ઐતિહાસિક ગંડન મઠમાં શ્રદ્ધાંજલિ અર્પણ કરી. આ મઠ ભારત અને મંગોલિયા વચ્ચેના વિશેષ અને આધ્યાત્મિક સંબંધોનું પ્રતીક છે." ભારતની મદદથી બૌદ્ધ હસ્તપ્રતોનું ડિજિટલાઇઝેશન થતું જોઈ પ્રસન્નતા વ્યક્ત કરતા તેમણે લખ્યું હતું, "ભારત-મંગોલિયા ભાગીદારી હેઠળ એક મિલિયન બૌદ્ધ હસ્તપ્રતોના ડિજિટલાઇઝેશનના પ્રોજેક્ટ પર કામ થતું જોઈ આનંદ થયો. ભારત આ મઠને આગળ પણ નિરંતર સહયોગ આપવા માટે પ્રતિબદ્ધ છે."