PM મોદી આજે ઇન્ડોનેશિયાના રાષ્ટ્રપતિ પ્રબોવો સુબિયાન્ટો સાથે ઐતિહાસિક 'પ્રમ્બાનન મંદિર'ની લેશે મુલાકાત

PM મોદી આજે ઇન્ડોનેશિયાના રાષ્ટ્રપતિ પ્રબોવો સુબિયાન્ટો સાથે ઐતિહાસિક 'પ્રમ્બાનન મંદિર'ની લેશે મુલાકાત

પ્રધાનમંત્રી નરેન્દ્ર મોદી પોતાની ઇન્ડોનેશિયા મુલાકાતના બીજા દિવસે આજે એક ખૂબ જ મહત્વપૂર્ણ અને ઐતિહાસિક સાંસ્કૃતિક કાર્યક્રમમાં ભાગ લેશે. PM મોદી આજે ઇન્ડોનેશિયાના રાષ્ટ્રપતિ પ્રબોવો સુબિયાન્ટો સાથે યોગ્યાકાર્તા સ્થિત પ્રખ્યાત પ્રમ્બાનન મંદિરની વિશેષ મુલાકાત લેશે.

આ મુલાકાત દરમિયાન બંને દેશો વચ્ચે એક મોટી જાહેરાત પણ થવા જઈ રહી છે, જેના હેઠળ ભારત સરકાર આ ભવ્ય મંદિર સંકુલના સંરક્ષણ અને પુનઃનિર્માણ માટે આર્થિક અને તકનીકી મદદ પૂરી પાડશે. આ પ્રોજેક્ટ ભારતની 'એક્ટ ઈસ્ટ' નીતિ અને સાંસ્કૃતિક કૂટનીતિનો એક મહત્વનો ભાગ છે.

ભારત-ઇન્ડોનેશિયાના 1000 વર્ષ જૂના સંબંધોની સાક્ષી
આ ઐતિહાસિક મુલાકાત ભારત અને ઇન્ડોનેશિયા વચ્ચે સદીઓ જૂના, એટલે કે 1000 વર્ષથી વધુ સમયથી અસ્તિત્વમાં રહેલા ઊંડા સાંસ્કૃતિક, ધાર્મિક અને સભ્યતાના સંબંધોને વૈશ્વિક મંચ પર પ્રદર્શિત કરે છે.
 
શું છે આ પ્રમ્બાનન મંદિરની વિશેષતાઓ?
૯મી સદીમાં નિર્મિત પ્રમ્બાનન મંદિર માત્ર ઇન્ડોનેશિયા જ નહીં, પરંતુ સમગ્ર દક્ષિણપૂર્વ એશિયાના સ્થાપત્યની શ્રેષ્ઠ કૃતિઓમાંનું એક ગણાય છે. આ મંદિર સાથે જોડાયેલી ખાસ વાતો નીચે મુજબ છે: 

સૌથી મોટું હિન્દુ મંદિર સંકુલ: 

આ ઇન્ડોનેશિયાનું સૌથી મોટું અને ભવ્ય હિન્દુ મંદિર સંકુલ છે, જેને UNESCO દ્વારા વર્લ્ડ હેરિટેજ સાઇટ જાહેર કરવામાં આવ્યું છે. મૂળરૂપે આ વિશાળ સંકુલમાં નાના-મોટા મળીને કુલ 240 મંદિરો આવેલા છે. આ મંદિરો સનાતન ધર્મના પૂજનીય દેવતાઓ બ્રહ્મા, વિષ્ણુ અને શિવ (ત્રિદેવ) ને સમર્પિત છે, જેમાં શિવજીનું મુખ્ય મંદિર 47 મીટર ઊંચું છે.

પથ્થરો પર કંડારેલી રામાયણ અને જીવંત પરંપરા

આ ઐતિહાસિક મંદિરની દિવાલો અને પથ્થરના કામ પર પવિત્ર ગ્રંથ 'રામાયણ' ના દ્રશ્યો ખૂબ જ સુંદર રીતે કોતરવામાં આવ્યા છે. સદીઓ વીતી ગઈ હોવા છતાં આજે પણ આ મંદિર સંકુલમાં ઓપન-એર થિયેટરમાં 'રામાયણ બેલે' (રામલીલા) નાટક ખૂબ જ ધામધૂમથી ભજવવામાં આવે છે, જે ઇન્ડોનેશિયાની સંસ્કૃતિનો એક અભિન્ન ભાગ બની ચૂક્યું છે.

આર્કિયોલોજિકલ સર્વે ઓફ ઇન્ડિયા (ASI) કરશે મદદ

સદીઓ દરમિયાન આવેલા ભૂકંપ અને જ્વાળામુખીના કારણે આ મંદિરના ઘણા હિસ્સાને નુકસાન પહોંચ્યું છે. હવે, ભારત તરફથી આર્કિયોલોજિકલ સર્વે ઓફ ઇન્ડિયા (ASI) ઇન્ડોનેશિયાની એજન્સીઓ સાથે મળીને આ મંદિર સંકુલના નાના મંદિરોના જીર્ણોદ્ધાર અને સંરક્ષણનું કામ સંભાળશે.

આ સાથે જ બંને દેશોએ ગુરુદેવ રવીન્દ્રનાથ ટાગોર અને ઇન્ડોનેશિયાના પ્રથમ શિક્ષણ મંત્રી દેવાંતરાની યાદમાં વર્ષ  2026-2027ને 'ટાગોર-દેવાંતરા સાંસ્કૃતિક અને શૈક્ષણિક કૂટનીતિ વર્ષ' તરીકે ઉજવવાની પણ જાહેરાત કરી છે.