આરિફ મોહમ્મદ ખાનને બિહારના નવા રાજ્યપાલ બનાવવામાં આવ્યા

રાષ્ટ્રપતિ દ્રૌપદી મુર્મૂએ ઓડિશાના રાજ્યપાલ રઘુવર દાસનું રાજીનામું સ્વીકારી લીધું છે. આ સાથે રાષ્ટ્રપતિએ ઘણા રાજ્યોમાં રાજ્યપાલોની પણ નિમણૂક કરી છે. તેમણે રાજ્યપાલોની નિમણૂક પર પણ ખુશી વ્યક્ત કરી છે. તમામ નિમણૂકો સંબંધિત કચેરીઓનો ચાર્જ સંભાળ્યાની તારીખથી અસરકારક રહેશે.

મંગળવારે સાંજે રાષ્ટ્રપતિ કાર્યાલયમાંથી બહાર પાડવામાં આવેલી યાદી અનુસાર, મિઝોરમના રાજ્યપાલ ડૉ. હરિ બાબુ કંભમપતિને ઓડિશાના રાજ્યપાલ તરીકે નિયુક્ત કરવામાં આવ્યા છે. રાષ્ટ્રપતિએ જનરલ ડૉ. વિજય કુમાર સિંહ, PVSM, AVSM, YSM (નિવૃત્ત)ને મિઝોરમના રાજ્યપાલ તરીકે નિયુક્ત કર્યા છે.

રાજેન્દ્ર વિશ્વનાથ આર્લેકર કેરળના રાજ્યપાલ બન્યા

આ સિવાય અન્ય કેટલાક રાજ્યોમાં રાજ્યપાલોની નવી નિમણૂંકો કરવામાં આવી છે. જેમાં કેરળના રાજ્યપાલ આરિફ મોહમ્મદ ખાનને બિહારના રાજ્યપાલ તરીકે નિયુક્ત કરવામાં આવ્યા છે. આરિફ મોહમ્મદ ખાન પોતાના નિવેદનોને કારણે ચર્ચામાં રહે છે. તેમના સ્થાને બિહારના રાજ્યપાલ તરીકે અત્યાર સુધી ફરજ બજાવતા રાજેન્દ્ર વિશ્વનાથ આર્લેકરને કેરળના રાજ્યપાલ તરીકે નિયુક્ત કરવામાં આવ્યા છે.

અજય કુમાર ભલ્લાને મણિપુરના રાજ્યપાલ બનાવાયા 

રાષ્ટ્રપતિએ પૂર્વ ગૃહ સચિવ અજય કુમાર ભલ્લાને મણિપુરના રાજ્યપાલ તરીકે નિયુક્ત કર્યા છે. અજય કુમાર ભલ્લા વિશે વાત કરીએ તો તેઓ ભારતીય વહીવટી સેવાના વરિષ્ઠ અધિકારી છે. તેઓ કેન્દ્રીય ગૃહ સચિવ તરીકે પણ રહી ચૂક્યા છે. તેમણે અનેક મહત્વના હોદ્દા પર સેવા આપી છે. તેઓ વહીવટી સુધારામાં તેમના યોગદાન અને કાર્યક્ષમતા માટે ઓળખાય છે. તેમના અનુભવને કારણે તેમને ઘણી વખત સેવામાં એક્સટેન્શન આપવામાં આવ્યું છે.