ઇન્કમ ટેક્સ વિભાગે લોન્ચ કરી નવી વેબસાઇટ, હવે AI આસિસ્ટન્ટ ‘કર સાથી’ સાથે ટેક્સ ભરવો થશે સરળ

ઇન્કમ ટેક્સ વિભાગે કરદાતાઓની સુવિધા માટે આર્ટિફિશિયલ ઇન્ટેલિજન્સ આસિસ્ટન્ટ ‘કર સાથી’ સાથે નવી વેબસાઇટ લોન્ચ કરી છે, જે ટેક્સ ભરવાની પ્રક્રિયાને પહેલા કરતા વધુ સરળ અને ઝડપી બનાવશે. આ યુઝર-ફ્રેન્ડલી વેબસાઇટ પર ટેક્સ કાયદા, કેલેન્ડર અને ઈ-સર્વિસીસ જેવી તમામ માહિતી એક જ જગ્યાએ ઉપલબ્ધ છે, જેને મોબાઈલ કે ડેસ્કટોપ પર સરળતાથી એક્સેસ કરી શકાય છે. કરદાતાઓ હવે ‘કર સાથી’ ચેટબોટ દ્વારા હિન્દી કે અંગ્રેજીમાં પોતાના પ્રશ્નો પૂછીને 24 કલાક તાત્કાલિક ઉકેલ મેળવી શકશે, જે સીબીડીટી દ્વારા કરદાતાઓની સહાય માટે લેવાયેલું મોટું પગલું છે.

ઇન્કમ ટેક્સ વિભાગે ગુરુવારે નવી વેબસાઇટ લોન્ચ કરી છે. આ વેબસાઇટને AI આસિસ્ટન્ટ ‘કર સાથી’સાથે લોન્ચ કરવામાં આવી છે. આનાથી ટેક્સ ભરવાનું કામ પહેલા કરતા વધુ સરળ બની જશે. ઇન્કમ ટેક્સ વિભાગ દ્વારા સોશિયલ મીડિયા પ્લેટફોર્મ ‘X’ પર કરવામાં આવેલી એક પોસ્ટમાં જણાવવામાં આવ્યું છે કે નવી ઇન્કમ ટેક્સ વેબસાઇટ શરૂ થઈ ગઈ છે. તે નેવિગેટ કરવામાં સરળ અને ઉપયોગમાં ઝડપી છે. આમાં ઇન્કમ ટેક્સને લગતી તમામ માહિતી એક જ જગ્યાએ ઉપલબ્ધ છે.

AI આસિસ્ટન્ટ ‘કર સાથી’ પર મોટો દાવો
પોસ્ટમાં આગળ જણાવાયું છે કે, આમાં AI આસિસ્ટન્ટ ‘કર સાથી’ આપવામાં આવ્યો છે જે ડાયરેક્ટ ટેક્સ ભરવાની તમારી મુસાફરીને સરળ બનાવશે. આ પોસ્ટ સાથે ઇન્કમ ટેક્સ વિભાગે એક વીડિયો પણ શેર કર્યો છે, જેમાં જણાવ્યું છે કે નવી ઇન્કમ ટેક્સ વેબસાઇટ લોન્ચ કરી દેવામાં આવી છે. આમાં વધુ માહિતી દર્શાવતી ડિઝાઇન અને સ્માર્ટ નેવિગેશનથી યુઝર્સ સરળતાથી માહિતી મેળવી શકશે.

યુઝર ફ્રેન્ડલી અને ટેકનોલોજીથી સજ્જ
વિભાગે જણાવ્યું કે વેબસાઇટને સર્વસમાવેશક અને યુઝર ફ્રેન્ડલી બનાવવામાં આવી છે અને તેને ડેસ્કટોપ, મોબાઈલ તેમજ ટેબ્લેટથી એક્સેસ કરી શકાય છે. ઇન્કમ ટેક્સ વિભાગે જણાવ્યું કે વેબસાઇટ પર ટેક્સ કાયદા અને નિયમો, ટેક્સની માહિતી અને સેવાઓ તથા ટેક્સ ઈ-સર્વિસીસના રૂપમાં યુનિફાઇડ ટેબ આપવામાં આવ્યા છે. જેના કારણે યુઝરને તમામ વિગતો એક જ સ્થળે મળી જશે.

કરદાતાઓ માટે માર્ગદર્શન સાધનો
આમાં FAQ, ઇન્ટરનેશનલ ટેક્સેશન, ટેક્સ કેલેન્ડર, સર્ક્યુલર અને નોટિફિકેશન તથા ઇન્કમ ટેક્સ પ્રોવિઝન જેવા માર્ગદર્શન સાધનો પણ આપવામાં આવ્યા છે. આ ઉપરાંત, AI આસિસ્ટન્ટ ‘કર સાથી’ ની મદદથી કરદાતા ટેક્સને લગતો પોતાનો કોઈ પણ પ્રશ્ન હિન્દી કે અંગ્રેજીમાં પૂછીને તાત્કાલિક ઉકેલ જાણી શકે છે.

ગયા મહિને સેન્ટ્રલ બોર્ડ ઓફ ડાયરેક્ટ ટેક્સિસ (CBDT) ના અધ્યક્ષ રવિ અગ્રવાલે એક ઇવેન્ટમાં ‘કર સાથી’ નો ઉલ્લેખ કર્યો હતો. તેમણે કહ્યું હતું કે, "આ AI-સક્ષમ ચેટબોટ વિભાગની વેબસાઇટ દ્વારા કરદાતાઓને ૨૪ કલાક સહાય પૂરી પાડશે."