ઇસરો રચશે નવો ઇતિહાસ: 24 ડિસેમ્બરે પ્રક્ષેપિત કરાશે 6.5 ટનનો અત્યાધુનિક ‘બ્લુબર્ડ-6’ ઉપગ્રહ

ભારતીય અવકાશ સંશોધન સંસ્થા (ISRO) આગામી 24 ડિસેમ્બરે એક મોટી સિદ્ધિ હાંસલ કરવા જઈ રહી છે.

ઇસરોએ સત્તાવાર જાહેરાત કરી છે કે તે યુએસ સ્થિત કંપની AST સ્પેસમોબાઇલ દ્વારા વિકસિત ‘બ્લુબર્ડ બ્લોક-2’ (બ્લુબર્ડ-6) ઉપગ્રહને લોન્ચ કરવા માટે સંપૂર્ણ સજ્જ છે. આ પ્રક્ષેપણ આંધ્રપ્રદેશના શ્રીહરિકોટા સ્થિત સતીશ ધવન સ્પેસ સેન્ટરથી કરવામાં આવશે.બ્લુબર્ડ-6 નું વજન આશરે 6.5 ટન છે, જે તેને વિશ્વના સૌથી ભારે વ્યાપારી ઉપગ્રહોમાંનો એક બનાવે છે.આ ઉપગ્રહને ભારતના સૌથી શક્તિશાળી રોકેટ LVM3 (લોન્ચ વ્હીકલ માર્ક-3) દ્વારા નીચી પૃથ્વી ભ્રમણકક્ષા (LEO) માં સ્થાપિત કરવામાં આવશે.લોન્ચ થયા બાદ આ ઉપગ્રહ અવકાશમાં આશરે 2,400 ચોરસ ફૂટનો વિસ્તાર ધરાવશે, જે બ્લુબર્ડ-1 અને 5 કરતા 3.5 ગણો મોટો છે.

AST સ્પેસમોબાઇલના જણાવ્યા અનુસાર, બ્લુબર્ડ-6 અગાઉના મોડલ કરતા 10 ગણી વધુ ડેટા ક્ષમતા પ્રદાન કરશે. આ ઉપગ્રહ વૈશ્વિક સ્તરે મોબાઇલ કનેક્ટિવિટી વધારવા માટે ડિઝાઇન કરવામાં આવ્યો છે. આ હેતુ માટે કંપનીએ વિશ્વભરના 50 થી વધુ મોબાઇલ ઓપરેટરો સાથે ભાગીદારી કરી છે.આ મિશન ભારત અને અમેરિકા વચ્ચેના વધતા અવકાશ સહયોગનું બીજું મોટું ઉદાહરણ છે. અગાઉ જુલાઈમાં ઇસરોએ $1.5 બિલિયનના NASA-ISRO (NISAR) મિશન હેઠળ પૃથ્વી સ્કેનિંગ રડાર લોન્ચ કર્યું હતું. બ્લુબર્ડ-6 નું વ્યાપારી સંચાલન ઇસરોની વાણિજ્યિક શાખા ન્યૂ સ્પેસ ઇન્ડિયા લિમિટેડ (NSIL) દ્વારા કરવામાં આવી રહ્યું છે.