ઉદયપુરમાં દેશભરના રાજ્ય પર્યટન મંત્રીઓ એકઠા: બે દિવસ પર્યટનની નવી પહેલો પર કરશે ચર્ચા

 કેન્દ્રીય પર્યટન મંત્રાલયે મંગળવારે રાજસ્થાનના ઉદયપુરમાં બે દિવસીય રાજ્ય પર્યટન મંત્રીઓની બેઠકનું આયોજન કર્યું. તેમાં તમામ રાજ્યો અને કેન્દ્રશાસિત પ્રદેશોના પર્યટન મંત્રીઓ અને વરિષ્ઠ અધિકારીઓ સામેલ થયા.

આ સંમેલનનો ઉદ્દેશ્ય પર્યટન પરિવર્તન એજન્ડાના અમલીકરણમાં વધુ નીતિગત સંવાદિતાને પ્રોત્સાહન આપવાનો છે. સાથે જ, એ સુનિશ્ચિત કરવાનું છે કે દરેક ક્ષેત્ર વિકસિત ભારત માટે વૈશ્વિક સ્તરે સ્પર્ધાત્મક અને ટકાઉ પર્યટન ઇકો-સિસ્ટમ બનાવવામાં યોગદાન આપે.

બેઠકમાં સ્ટેકહોલ્ડર્સ (હિતધારકો) સાથે ચાલી રહેલા પરામર્શને ચાલુ રાખવા પર ધ્યાન કેન્દ્રિત કરવામાં આવ્યું. અહીં રાજ્ય અને કેન્દ્રશાસિત પ્રદેશોના પર્યટન મંત્રીઓએ બે મુખ્ય સ્તંભો પર પોતાનો દૃષ્ટિકોણ રજૂ કર્યો:

1. '50 ગંતવ્યોના વિકાસ' માટેની માળખાકીય રૂપરેખા.

2. 'પ્રદર્શન સાથે જોડાયેલ પ્રોત્સાહન' પ્રદાન કરવા માટેની માળખાકીય રૂપરેખા.

આ ચર્ચામાં પીએલઆઈ (PLI) આધારિત ગંતવ્ય પરિપક્વતા મોડેલ દ્વારા ખાનગી ક્ષેત્રના નેતૃત્વ હેઠળના પર્યટન કેન્દ્ર વિકાસ અને ગંતવ્ય વ્યવસ્થાપન પર ભાર મૂકવામાં આવ્યો.પર્યટન સચિવ વી. વિદ્યાવતીના ઉદ્ઘાટન પ્રવચનથી બેઠકની શરૂઆત થઈ. ત્યારબાદ કેન્દ્રીય પર્યટન અને સંસ્કૃતિ મંત્રી ગજેન્દ્ર સિંહ શેખાવતે બે દિવસીય ચર્ચાનો સંદર્ભ રજૂ કર્યો. આ કાર્યક્રમમાં વૈશ્વિક ધોરણોના પર્યટન સ્થળોના વિકાસના લક્ષ્યને સાકાર કરવા માટે કેન્દ્ર, રાજ્યો/કેન્દ્રશાસિત પ્રદેશો અને ઉદ્યોગના હિતધારકો વચ્ચે સહયોગી કાર્યવાહીના મહત્વ પર ભાર મૂકવામાં આવ્યો.

બે દિવસ (14- 15 ઓક્ટોબર 2025 )ની બેઠક દરમિયાન, વિવિધ રાજ્યોના પર્યટન મંત્રીઓ અને અધિકારીઓ:બજેટની પહેલો સાથે જોડાયેલી ગંતવ્યની વિભાવનાઓ (Destination Concepts) રજૂ કરશે.તમામ રાજ્યો અને કેન્દ્રશાસિત પ્રદેશો વૈશ્વિક ગંતવ્ય તરીકે વિકાસ માટે એક સંભવિત ગંતવ્યનું પ્રદર્શન કરશે અને પોતાનો દૃષ્ટિકોણ રજૂ કરશે.બુધવારે, બીજા દિવસે, સંકલિત પર્યટન પ્રમોશન યોજના (Integrated Tourism Promotion Scheme) માર્ગદર્શિકાના ડ્રાફ્ટ પર પરામર્શ કરવામાં આવશે. તેનો ઉદ્દેશ્ય ભારતને સ્થાનિક અને આંતરરાષ્ટ્રીય બંને બજારોમાં એક સર્વગ્રાહી પર્યટન સ્થળ તરીકે સ્થાપિત કરવાનો છે.