કેન્દ્રીય ગૃહ મંત્રાલયે કેજરીવાલ અને મનીષ સિસોદિયા સામે કેસ ચલાવવા EDને મંજૂરી આપી

કેન્દ્રીય ગૃહ મંત્રાલયે દારૂ કૌભાંડ કેસ સંબંધિત મની લોન્ડરિંગમાં કથિત સંડોવણી બદલ અરવિંદ કેજરીવાલ પર પ્રિવેન્શન ઓફ મની લોન્ડરિંગ એક્ટ હેઠળ કેસ ચલાવવા માટે EDને મંજૂરી આપી છે. સૂત્રોના જણાવ્યા અનુસાર, AAPના વરિષ્ઠ નેતા અને ભૂતપૂર્વ નાયબ મુખ્યમંત્રી મનીષ સિસોદિયા પર કેસ ચલાવવાની પણ મંજૂરી આપવામાં આવી છે.

નવેમ્બર 2024માં સુપ્રીમ કોર્ટે ચુકાદો આપ્યો હતો કે ED ફોજદારી કાર્યવાહી સંહિતાની કલમ 197 (1)  હેઠળ મની લોન્ડરિંગ કેસોની પણ તપાસ કરી શકે છે. આ કાયદા હેઠળ કાર્યવાહી કરવા માટે આ પગલું લેવામાં આવ્યું છે. સીબીઆઈના કિસ્સામાં જેમ પૂર્વ મંજૂરી લેવી પડશે. દિલ્હીની એક ખાસ પીએમએલએ કોર્ટે અરવિંદ કેજરીવાલ વિરુદ્ધ આરોપો ઘડવાની પ્રક્રિયા પર સ્ટે મૂક્યો હતો, કારણ કે તેમણે દિલ્હી હાઈકોર્ટમાં પડકાર ફેંક્યો હતો કે પીએમએલએ હેઠળ કાર્યવાહીની મંજૂરી વિના ચાર્જશીટ પર ધ્યાન આપી શકાય નહીં. લેફ્ટનન્ટ ગવર્નર વીકે સક્સેનાએ ગયા મહિને એજન્સીને ભૂતપૂર્વ સીએમ કેજરીવાલ સામે કેસ ચલાવવાની મંજૂરી આપી હતી. ભ્રષ્ટાચાર નિવારણ અધિનિયમ હેઠળ ચાર્જશીટ દાખલ કરનાર સીબીઆઈને દારૂ નીતિ સંબંધિત ભ્રષ્ટાચાર કેસમાં ઓગસ્ટ 2024 માં જરૂરી મંજૂરી મળી ગઈ હતી.

ED એ અરવિંદ કેજરીવાલની ધરપકડ કરી હતી અને તેમનું નામ ચાર્જશીટમાં સામેલ કર્યું હતું. કેજરીવાલ હાલમાં જામીન પર બહાર છે. ચાર્જશીટમાં, ED એ દાવો કર્યો હતો કે ગોવાની ચૂંટણીમાં પ્રચાર કરવા માટે તેમણે કેટલાક દારૂના વેપારીઓની તરફેણ કરવા માટે લાંચ લીધી હતી. તપાસ એજન્સીએ કહ્યું હતું કે, રાષ્ટ્રીય સંયોજક અને AAPના રાષ્ટ્રીય કાર્યકારિણીના સભ્ય તરીકે, કેજરીવાલ ભંડોળના ઉપયોગ અને જનરેટ થયેલા નાણાં માટે જવાબદાર હતા. કેજરીવાલ અને આમ આદમી પાર્ટી પર 'સાઉથ ગ્રુપ' નામના કાર્ટેલ પાસેથી લાંચ લેવાનો આરોપ છે, જે રાષ્ટ્રીય રાજધાનીમાં દારૂના વેચાણ અને વિતરણને નિયંત્રિત કરતી હતી. એવો આરોપ છે કે આ જૂથે કથિત રીતે દિલ્હી સરકાર દ્વારા 2021-22 માટે ઘડવામાં આવેલી આબકારી નીતિનો લાભ લીધો હતો.