કેન્દ્રીય નાણામંત્રી નિર્મલા સીતારમણની અધ્યક્ષતામાં મળશે GST કાઉન્સિલની બેઠક

ગુડ્સ એન્ડ સર્વિસ ટેક્સ (GST) કાઉન્સિલની મહત્વપૂર્ણ 57મી બેઠક આજે નવી દિલ્હીના ભારત મંડપમ ખાતે શરૂ થઈ છે. કેન્દ્રીય નાણામંત્રી નિર્મલા સીતારમણની અધ્યક્ષતામાં યોજાઈ રહેલી આ બેઠકમાં મહારાષ્ટ્રના મુખ્યમંત્રી દેવેન્દ્ર ફડણવીસ, કર્ણાટકના મુખ્યમંત્રી ડી.કે. શિવકુમાર, જમ્મુ-કાશ્મીરના મુખ્યમંત્રી ઓમર અબ્દુલ્લા, હરિયાણાના મુખ્યમંત્રી નાયબ સિંહ સૈની ઉપરાંત વિવિધ રાજ્યો અને કેન્દ્રશાસિત પ્રદેશોના નાણામંત્રીઓ વિશેષરૂપે ઉપસ્થિત રહ્યા છે.

પાંચ-મુદ્દાની યોજના અને વહીવટી સરળતા આ બેઠકનો મુખ્ય ઉદ્દેશ્ય GST વિવાદોના ઉકેલ માટે નીતિગત સુધારાઓ લાવવા અને ઇનપુટ ટેક્સ ક્રેડિટ (ITC) ના પ્રવાહને વધુ સરળ બનાવવાનો છે, જેથી પાલન સમય (Compliance time) અને ખર્ચમાં નોંધપાત્ર ઘટાડો થઈ શકે. નાણા મંત્રાલયના સૂત્રોના જણાવ્યા અનુસાર, સરકાર GST સિસ્ટમમાં સુધારાના આગામી તબક્કા માટે ખાસ 'પાંચ-મુદ્દાની યોજના' પ્રસ્તાવિત કરી રહી છે, જેનો મુખ્ય હેતુ નાના વ્યવસાયો પરથી પાલનનો બોજ ઘટાડવાનો છે.

• ઓટોમેટિક બિલ-રસીદ મેચિંગ: ખરીદદારો અને વેચાણકર્તાઓ વચ્ચે ટેક્સ પ્રક્રિયાને પારદર્શક બનાવવા સ્વચાલિત વ્યવસ્થા.

• કાગળકામમાં ઘટાડો: ઇનપુટ ટેક્સ ક્રેડિટ (ITC) દાવાઓ સંબંધિત જટિલ દસ્તાવેજીકરણને સરળ બનાવવું.

• રિટર્નમાં સરળતા: નાના કરદાતાઓ દ્વારા ફાઇલ કરવા પડતા રિટર્નની સંખ્યા ઘટાડવી.

• બહુવિધ નોંધણીમાંથી મુક્તિ: નાના વ્યવસાયો માટે અનેક રાજ્યોમાં અલગ-અલગ નોંધણી કરાવવાની જરૂરિયાતને દૂર કરવી.

ઉલ્લેખનીય છે કે અગાઉ કાઉન્સિલની ૫૬મી બેઠક ગત વર્ષે સપ્ટેમ્બરમાં યોજાઈ હતી, જેમાં સામાન્ય જનતા, શ્રમ-સઘન ઉદ્યોગો, ખેડૂતો તેમજ કૃષિ અને આરોગ્ય જેવા અર્થતંત્રના મુખ્ય ક્ષેત્રોના હિતોને ધ્યાનમાં રાખીને GSTના તર્કસંગતકરણને મંજૂરી આપવામાં આવી હતી.