ગાઝા-ઈઝરાયલ સંઘર્ષ રોકવા હમાસ તૈયાર, PM મોદીએ ટ્રમ્પના પ્રયાસની પ્રશંસા કરી

પ્રધાનમંત્રી નરેન્દ્ર મોદીએ અમેરિકી રાષ્ટ્રપતિ ડોનાલ્ડ ટ્રમ્પની પ્રશંસા કરી છે. તેમણે સોશિયલ મીડિયા 'એક્સ' પર એક પોસ્ટમાં લખ્યું, "ગાઝામાં શાંતિના પ્રયાસોમાં નિર્ણાયક પ્રગતિ માટે અમે રાષ્ટ્રપતિ ટ્રમ્પના નેતૃત્વનું સ્વાગત કરીએ છીએ. બંધકોની મુક્તિના સંકેતો એક મહત્ત્વપૂર્ણ પગલું છે."

છેલ્લા બે વર્ષથી ચાલી રહેલા યુદ્ધ પછી હવે ગાઝાના વિસ્તારમાં શાંતિ પુનઃસ્થાપિત થવાની આશા વધી ગઈ છે. હમાસ અમેરિકી રાષ્ટ્રપતિ ટ્રમ્પની યોજનાની ઘણી મહત્ત્વપૂર્ણ શરતોને માનવા માટે સહમત થઈ ગયું છે. બીજી તરફ, ઇઝરાયેલે પણ કહ્યું છે કે તે હવે ગાઝામાં હુમલા નહીં કરે. ટ્રમ્પની શાંતિ યોજનાના પ્રથમ તબક્કાને લાગુ કરવાની દિશામાં તે આગળ વધી રહ્યું છે. આ દરમિયાન ભારતના વડા પ્રધાન નરેન્દ્ર મોદીએ ગાઝામાં શાંતિ પુનઃસ્થાપિત કરવાના આ પ્રયાસો માટે અમેરિકી રાષ્ટ્રપતિ ડોનાલ્ડ ટ્રમ્પની ખુલીને પ્રશંસા કરી છે.

PM મોદીની સોશિયલ મીડિયા 'એક્સ' પર પોસ્ટ:

"ગાઝામાં શાંતિ પ્રયાસોમાં નિર્ણાયક પ્રગતિ માટે અમે રાષ્ટ્રપતિ ટ્રમ્પના નેતૃત્વનું સ્વાગત કરીએ છીએ. બંધકોને મુક્તિના સંકેતો એક મહત્ત્વપૂર્ણ પગલું છે. ભારત સ્થાયી અને ન્યાયસંગત શાંતિની દિશામાં તમામ પ્રયાસોને દૃઢતાથી સમર્થન આપતું રહેશે." ગાઝા-ઇઝરાયેલ વચ્ચે ચાલી રહેલો સંઘર્ષ રોકવા માટે હમાસ સહમત થતાં સંયુક્ત રાષ્ટ્રએ પણ નિર્ણયનું સ્વાગત કર્યું છે. ગાઝા-ઇઝરાયેલ વચ્ચે ચાલી રહેલા સંઘર્ષની વચ્ચે, પેલેસ્ટાઇની સશસ્ત્ર જૂથ હમાસે અમેરિકી રાષ્ટ્રપતિ ડોનાલ્ડ ટ્રમ્પના શાંતિ પ્રસ્તાવ પર વાતચીત કરવાની ઇચ્છા વ્યક્ત કરી છે. સંયુક્ત રાષ્ટ્રના મહાસચિવ એન્ટોનિયો ગુટેરેસે હમાસના આ નિર્ણયનું સ્વાગત કર્યું છે. આ માહિતી સંયુક્ત રાષ્ટ્ર પ્રમુખના પ્રવક્તા સ્ટીફન દુજારિકએ આપી. દુજારિકે એક નિવેદનમાં કહ્યું કે સંયુક્ત રાષ્ટ્રના મહાસચિવ એન્ટોનિયો ગુટેરેસ હમાસ દ્વારા જારી કરાયેલા નિવેદનનું સ્વાગત કરે છે અને તેનાથી ઉત્સાહિત છે. પ્રવક્તાએ કહ્યું કે સંયુક્ત રાષ્ટ્ર પ્રમુખ એન્ટોનિયો ગુટેરેસે તમામ પક્ષોને ગાઝા પટ્ટીમાં સંઘર્ષ સમાપ્ત કરવાની આ તકનો લાભ લેવા વિનંતી કરી અને કતાર તથા ઇજિપ્તનો તેમના અમૂલ્ય મધ્યસ્થી કાર્ય માટે આભાર માન્યો. મહાસચિવએ તાત્કાલિક અને કાયમી યુદ્ધવિરામ, તમામ બંધકોની તાત્કાલિક અને બિનશરતી મુક્તિ અને અનિર્બદ્ધ માનવીય પહોંચ માટેના તેમના આહ્વાનને પુનરાવર્તિત કર્યું. તેમણે કહ્યું કે સંયુક્ત રાષ્ટ્ર વધુ પીડાને રોકવા માટે આ ઉદ્દેશોની દિશામાં તમામ પ્રયાસોને સમર્થન આપશે.

હમાસની સૈદ્ધાંતિક સંમતિ

ખાનગી સમાચાર એજન્સીના રિપોર્ટ અનુસાર, હમાસે શુક્રવારે જાહેરાત કરી કે તેણે ટ્રમ્પના ગાઝા શાંતિ પ્રસ્તાવ પર પ્રાદેશિક અને આંતરરાષ્ટ્રીય મધ્યસ્થીઓને પોતાનો જવાબ સુપરત કર્યો છે. તેણે કહ્યું કે તે સૈદ્ધાંતિક રીતે તમામ જીવિત અને મૃત ઇઝરાયેલી બંધકોને મુક્ત કરવા માટે સહમત થઈ ગયું છે. એક પ્રેસ નિવેદનમાં, પેલેસ્ટાઇની સશસ્ત્ર જૂથે ગાઝા વહીવટને સ્વતંત્ર તકનીકી નિષ્ણાતોના પેલેસ્ટાઇની જૂથને સોંપવા પર પણ સંમતિ વ્યક્ત કરી છે, જેનું ગઠન રાષ્ટ્રીય સર્વસંમતિથી થયું છે અને જેને અરબ તથા ઇસ્લામિક દેશોનું સમર્થન પ્રાપ્ત છે.

શાંતિ પ્રસ્તાવને લઈ ડોનાલ્ડ ટ્રમ્પની પોસ્ટ:

"હમાસના નિવેદનના આધારે મારો વિશ્વાસ છે કે તેઓ કાયમી શાંતિ માટે તૈયાર છે. ઇઝરાયેલે ગાઝા પર બોમ્બમારા તાત્કાલિક બંધ કરી દેવો જોઈએ. અમે પહેલાથી જ તે વિગતો પર ચર્ચા કરી રહ્યા છીએ જેના પર કામ કરવાનું છે. આ માત્ર ગાઝા વિશે નથી, આ મધ્ય પૂર્વમાં લાંબા સમયથી ચાહવામાં આવતી શાંતિ વિશે છે." સોમવારે અમેરિકી રાષ્ટ્રપતિએ ઇઝરાયેલના વડા પ્રધાન બેન્જામિન નેતન્યાહુ સાથે વાતચીત કર્યા બાદ 20-સૂત્રીય શાંતિ પ્રસ્તાવ રજૂ કર્યો હતો, જેમાં બંધકો માટે યુદ્ધવિરામ કરાર, બંધકોને મુક્ત કરવા, ગાઝાનું વિસૈન્યકરણ અને સંઘર્ષ સમાપ્ત થયા પછી ગાઝાના પુનર્નિર્માણ અને વહીવટની આંતરરાષ્ટ્રીય દેખરેખની રૂપરેખા સામેલ છે.