ચારધામ યાત્રા પરનો 24 કલાકનો પ્રતિબંધ હટ્યો, જિલ્લા મેજિસ્ટ્રેટને ખાસ સૂચના

ઉત્તરાખંડમાં ભારે વરસાદ અને ભૂસ્ખલનને કારણે રવિવારે ચારધામ યાત્રા પર લગાવવામાં આવેલા 24 કલાકના પ્રતિબંધને હટાવવામાં આવ્યો સાથે રુટ પરના તમામ જિલ્લાના જિલ્લા મેજિસ્ટ્રેટને ખાસ સૂચનાઓ આપવામાં આવી.

ચારધામ યાત્રા પર 24 કલાકનો પ્રતિબંધ રવિવારે લાદવામાં આવ્યો હતો, જે હવે હટાવી લેવામાં આવ્યો છે. અધિકારીઓએ સોમવારે કહ્યું કે, ચારધામ યાત્રા પરનો પ્રતિબંધ હટાવી લેવામાં આવ્યો છે અને યાત્રા ફરી એકવાર શરૂ થઈ ગઈ છે.

જિલ્લા મેજિસ્ટ્રેટ્સને કડક સૂચના આપવામાં આવી

ગઢવાલના ડિવિઝનલ કમિશનર વિનય શંકર પાંડેએ કહ્યું કે, ચારધામ યાત્રા પર લાદવામાં આવેલો 24 કલાકનો પ્રતિબંધ હવે હટાવી લેવામાં આવ્યો છે. યાત્રા રૂટ પર આવતા જિલ્લાઓના જિલ્લા મેજિસ્ટ્રેટને તેમના સંબંધિત વિસ્તારોમાં હવામાનની સ્થિતિ અનુસાર વાહનો રોકવા અથવા ખસેડવાની સૂચના આપવામાં આવી છે.

સંબંધિત જિલ્લાઓનું વહીવટીતંત્ર હાઇ એલર્ટ પર  

ઉલ્લેખનીય છે કે, ઉત્તરાખંડમાં સતત ભારે વરસાદ અને ભૂસ્ખલનના વધતા જોખમને ધ્યાનમાં રાખીને, રવિવારે ચારધામ યાત્રા એક દિવસ માટે મુલતવી રાખવામાં આવી હતી. યાત્રા મુલતવી રાખવા અંગે માહિતી આપતા ગઢવાલ કમિશનર વિનય શંકર પાંડેએ રવિવારે કહ્યું હતું કે, સતત ભારે વરસાદ અને ભૂસ્ખલનની સંભાવનાને ધ્યાનમાં રાખીને, ચારધામ યાત્રા એક દિવસ માટે મુલતવી રાખવામાં આવી હતી.

લોકો અને સંપત્તિના રક્ષણ માટે સાવચેતીભર્યું પગલું 

લોકો અને સંપત્તિનું રક્ષણ કરવા માટે આ સાવચેતીભર્યું પગલું લેવામાં આવ્યું છે. તેમણે યાત્રાળુઓને વિનંતી કરી કે તેઓ જ્યાં છે ત્યાં જ રહે અને પરિસ્થિતિ સુધરે ત્યાં સુધી કેદારનાથ, બદ્રીનાથ, ગંગોત્રી અને યમુનોત્રીની યાત્રા કરવાનું ટાળે. સંબંધિત જિલ્લાઓના વહીવટીતંત્રને હાઇ એલર્ટ પર રાખવામાં આવ્યું છે અને બચાવ-રાહત ટીમો સક્રિય કરવામાં આવી છે.

ભક્તોને માર્ગદર્શિકાનું પાલન કરવાની પાલન 

કમિશનર વિનય શંકર પાંડેએ કહ્યું કે, "હવામાનની સ્થિતિ અને માર્ગોની સમીક્ષા કર્યા પછી આગળની મુસાફરી અંગે નિર્ણય લેવામાં આવશે. શ્રદ્ધાળુઓને વહીવટીતંત્ર દ્વારા જારી કરાયેલી માર્ગદર્શિકાનું પાલન કરવા અને હવામાન સામાન્ય ન થાય ત્યાં સુધી યાત્રા સ્થળોએ ન જવા માટે કહેવામાં આવ્યું છે."

મહત્ત્વપૂર્ણ છે કે, છેલ્લા કેટલાક દિવસોમાં વરસાદ અને ભૂસ્ખલનને કારણે ઘણી જગ્યાએ રસ્તાઓ બંધ થઈ ગયા છે. ચારધામ યાત્રા કરવા આવેલા યાત્રાળુઓને હવામાન સંબંધિત માહિતી લીધા પછી જ તેમની યાત્રા શરૂ કરવા અને યાત્રા દરમિયાન સતર્ક રહેવાની અપીલ કરવામાં આવી છે. રાજ્ય આપત્તિ વ્યવસ્થાપન સચિવે લોકોને વરસાદ દરમિયાન બિનજરૂરી મુસાફરી ટાળવાની પણ સલાહ આપી છે.