દિલ્હીની 2 શાળા અને 3 કોર્ટને બોમ્બથી ઉડાવવાની ધમકી, સુરક્ષા વધારાઈ

રાષ્ટ્રીય રાજધાનીમાં 2 શાળાઓ અને 3 કોર્ટમાં મંગળવારે બોમ્બની ધમકીના ઈમેઇલ મળ્યા હતા, જેના કારણે શાળાઓ તાત્કાલિક ખાલી કરાવવામાં આવી હતી, એમ પોલીસ અધિકારીઓએ જણાવ્યું હતું.

દ્વારકામાં એક CRPF સ્કૂલ અને પ્રશાંત વિહારમાં બીજી શાળાને ધમકીભર્યા ઈમેઇલ મળ્યા હતા. આ ઉપરાંત સાકેત કોર્ટ, પટિયાલા હાઉસ કોર્ટ અને રોહિણી કોર્ટને પણ ધમકીઓ મળી હતી.

સાકેત બાર એસોસિએશનના સેક્રેટરી અનિલ બસોયાએ જણાવ્યું હતું કે સુરક્ષા કારણોસર કોર્ટની કાર્યવાહી આગામી 2 કલાક માટે સ્થગિત કરવામાં આવી છે. બપોરના ભોજન પછી કાર્યવાહી ફરી શરૂ થશે. કૃપા કરીને શાંત રહો, સહકાર આપો અને ભીડ ટાળો.

ફાયર બ્રિગેડ ટીમો અને બોમ્બ ડિસ્પોઝલ સ્ક્વોડ સાથે પોલીસ અધિકારીઓ ઘટનાસ્થળે દોડી ગયા અને વિદ્યાર્થીઓ અને અધિકારીઓને બહાર કાઢ્યા.

ઘટનાસ્થળે હાજર પોલીસે જણાવ્યું હતું કે અત્યાર સુધી તપાસમાં કંઈ શંકાસ્પદ મળ્યું નથી. અધિકારીઓ હજુ પણ તમામ સ્થળો અને ઇમેઇલના સ્ત્રોતની તપાસ કરી રહ્યા છે.

આ શાળાઓ પ્રશાંત વિહાર અને દ્વારકામાં આવેલી છે. સવારે 9 વાગ્યાની આસપાસ બોમ્બ ધમકીના ફોન આવ્યા હતા. બંને શાળાઓમાં સંપૂર્ણ તપાસ કરી પરંતુ કંઈ શંકાસ્પદ મળ્યું નથી. ધમકીભર્યા ઈમેઇલને બનાવટી જાહેર કરવામાં આવ્યો છે.

પરિસ્થિતિને ધ્યાનમાં રાખીને, રાષ્ટ્રીય રાજધાનીની તમામ જિલ્લા અદાલતોમાં સુરક્ષા વધારી દેવામાં આવી છે, અને સાવચેતીના પગલા તરીકે અધિકારીઓને હાઈ એલર્ટ પર રાખવામાં આવ્યા છે.