દીવમાં ખેલો ઇન્ડિયા બીચ ગેમ્સનો પ્રારંભ, મંત્રી ડૉ. મનસુખ માંડવિયાના હસ્તે ઉદ્ઘાટન

દીવમાં બ્લુ સર્ટિફાઇડ ઘોઘલા બીચ પર પ્રથમ ખેલો ઇન્ડિયા બીચ ગેમ્સનો પ્રારંભ.. મંત્રી માંડવિયાએ કહ્યું, ખેલો ઇન્ડિયા પેરા ગેમ્સ દ્વારા આપણા રમતવીરોને મળી રહી છે શ્રેષ્ઠ તક અને તેઓ સફળતાનો મોકળો માર્ગ કરી રહ્યાં છે.

પ્રથમ ખેલો ઇન્ડિયા બીચ ગેમ્સની સોમવારે સાંજે દીવના ઘોઘલા બીચ પર શરૂઆત થઈ હતી. કેન્દ્રીય રમતગમત મંત્રી મનસુખ માંડવિયાએ ભવ્ય સમારોહમાં રમતોનું ઉદ્ઘાટન કર્યું હતું. આ ઉત્સવમાં વિવિધ પરંપરાગત નૃત્યો દ્વારા ભારતની વિવિધતા દર્શાવવામાં આવી હતી. આ પ્રસંગે ડોકટર મનસુખ માંડવિયાએ કહ્યું હતું કે, ભારત 2047 સુધીમાં રમતગમતમાં મહાસત્તા બનવા માટે પ્રતિબદ્ધ છે. આ રમતોમાં 30 રાજ્યો અને કેન્દ્રશાસિત પ્રદેશોના 1 હજાર 350થી વધુ ખેલાડીઓએ વિવિધ સ્પર્ધાઓમાં ભાગ લીધો છે. ખેલાડીઓ ફૂટબોલ, વોલીબોલ, કબડ્ડી, સ્વિમિંગ જેવી વિવિધ સ્પર્ધાઓ યોજાશે. પ્રધાનમંત્રી નરેન્દ્ર મોદીએ પણ ખેલો ઇન્ડિયા બીચ ગેમ્સને દેશના રમતગમત ઇતિહાસમાં એક મહત્ત્વપૂર્ણ ક્ષણ ગણાવી છે. પોતાના સંદેશમાં, તેમણે રમતોના આયોજકોને અભિનંદન અને શુભેચ્છા પાઠવી હતી.

19થી 25 મે સુધી ખેલો ઇન્ડિયા બીચ ગેમ્સનું આયોજન 

દેશભરમાં પાયાના સ્તરે રમતગમત અને રમતવીરોના વિકાસને મજબૂત બનાવવાના એક મહત્ત્વપૂર્ણ પગલામાં ભારત સરકારના યુવા બાબતો અને રમતગમત મંત્રાલયએ ખેલો ઇન્ડિયા પહેલ હેઠળ એક વ્યાપક વાર્ષિક કેલેન્ડર શરૂ કર્યું છે. જે અંતર્ગત દીવમાં તારીખ 19થી 25 મે સુધી ખેલો ઇન્ડિયા બીચ ગેમ્સનું આયોજન કરવામાં આવ્યું છે. જેનાથી રમતવીરોને પ્રોત્સાહન પ્રાપ્ત થશે અને પોતાની કલા રજૂ કરવા માટે મંચ પણ મળશે.