પહેલગામના લારી પોરામાં ભીષણ આગ: રિસોર્ટની 3 બિલ્ડિંગો ખાખ

પહેલગામના લારી પોરામાં ભીષણ આગ: રિસોર્ટની 3 બિલ્ડિંગો ખાખ

જમ્મુ-કાશ્મીરના અનંતનાગ જિલ્લામાં આવેલા વિશ્વ પ્રસિદ્ધ હિલ સ્ટેશન પહેલગામના લારી પોરા વિસ્તારમાં આવેલ 'અસાલ રિસોર્ટ'માં ભયાનક આગ ફાટી નીકળી હતી. જોતજોતામાં આગે વિકરાળ સ્વરૂપ ધારણ કરી લેતા રિસોર્ટની ત્રણ બિલ્ડિંગો આગની લપેટમાં આવી ગઈ હતી, જેના કારણે ભારે નુકસાન થયું છે.

સિલિન્ડર બ્લાસ્ટને કારણે મુશ્કેલી વધી

ઘટનાની જાણ થતા જ ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ હતી અને આગ પર કાબૂ મેળવવાનો પ્રયાસ શરૂ કર્યો હતો. જોકે, આગ ઓલવવાની કામગીરી દરમિયાન રિસોર્ટમાં રાખેલા ગેસ સિલિન્ડરોમાં જોરદાર બ્લાસ્ટ થવા લાગ્યા હતા. આ બ્લાસ્ટને કારણે આગ વધુ ભભૂકી ઉઠી હતી અને ફાયર જવાનોને કામગીરી કરવામાં ભારે મુશ્કેલીનો સામનો કરવો પડ્યો હતો.