પુંછ, ઉધમપુરથી બાડમેર સુધી પરિસ્થિતિ સામાન્ય, જમ્મુ-કાશ્મીર સરકારે ખોટા સમાચારોથી સાવધ રહેવા અપીલ

જમ્મુ અને કાશ્મીર સરકારે રવિવારે નાગરિકોને શાંતિ જાળવવા અને સોશિયલ મીડિયા પર ફરતા ખોટા દાવાઓથી દૂર રહેવા વિનંતી કરી છે. જમ્મુ અને કાશ્મીર સરકારે તેના સત્તાવાર X એકાઉન્ટ પર કહ્યું કે, તે તેના નાગરિકોની સહનશક્તિ અને ભરોસાની પ્રશંસા કરે છે. સરકાર તમામ જરૂરી પગલાં લઈ રહી છે

જમ્મુ, પૂંછમાં પરિસ્થિતિ સામાન્ય, આખી રાત ગોળીબારના કોઈ સમાચાર નથી

ભારત અને પાકિસ્તાન વચ્ચે યુદ્ધવિરામની ઘોષણા બાદ જમ્મુ-કાશ્મીર અને રાજસ્થાનને અડીને આવેલા સરહદી વિસ્તારોમાં પરિસ્થિતિ સામાન્ય છે. રવિવારે સવારે જમ્મુ-કાશ્મીરના પૂંછ, ઉધમપુર અને રાજસ્થાનના બાડમેરમાં પરિસ્થિતિ શાંતિપૂર્ણ રહી. આ સમયગાળા દરમિયાન ડ્રોન પ્રવૃત્તિ, ગોળીબાર કે તોપમારાનો કોઈ સમાચાર નથી.

દરમિયાન જમ્મુ અને કાશ્મીર સરકારે રવિવારે નાગરિકોને શાંતિ જાળવવા અને સોશિયલ મીડિયા પર ફરતા ખોટા દાવાઓથી દૂર રહેવા વિનંતી કરી છે. જમ્મુ અને કાશ્મીર સરકારે તેના સત્તાવાર X એકાઉન્ટ પર કહ્યું કે, તે તેના નાગરિકોની સહનશક્તિ અને ભરોસાની પ્રશંસા કરે છે. સરકાર તમામ જરૂરી પગલાં લઈ રહી છે અને કોઈપણ પરિસ્થિતિનો સામનો કરવા માટે સંપૂર્ણપણે તૈયાર છે. ગભરાવાની કોઈ જરૂર નથી.

દરમિયાન ખોટી માહિતીના વધતા જોખમને ધ્યાનમાં રાખીને સંરક્ષણ મંત્રાલયે નાગરિકોને વોટ્સએપ પર ફેલાતા ખોટા સમાચારોથી સાવધ રહેવા અને ફક્ત વિશ્વસનીય સ્ત્રોતો પર વિશ્વાસ કરવા જણાવ્યું છે. મંત્રાલયે લોકોને તેની સત્તાવાર વોટ્સએપ ચેનલને ફોલો કરવાની સલાહ આપી. "આ સંવેદનશીલ સમયમાં, WhatsApp પર ઘણી બધી ખોટી માહિતી અને ખોટા સમાચાર ફેલાવવામાં આવી રહ્યા છે. કૃપા કરીને સતર્ક રહો અને સંરક્ષણ મંત્રાલય સંબંધિત સચોટ માહિતી માટે અમારી WhatsApp ચેનલને ફોલો કરો," સંરક્ષણ મંત્રાલયે ટ્વિટર પર લખ્યું.

જમ્મુ અને કાશ્મીર સરકારે કહ્યું કે, લોકોએ રાષ્ટ્રીય આપત્તિ વ્યવસ્થાપન સત્તામંડળ (NDMA) અને અન્ય સરકારી એજન્સીઓ દ્વારા જારી કરાયેલ માનક સંચાલન પ્રક્રિયાઓ (SOPs)નું પાલન કરવું જોઈએ. સરકારે કહ્યું, "સોશિયલ મીડિયા પર ફરતી ખોટી માહિતી અને અપ્રમાણિત દાવાઓ બિનજરૂરી ગભરાટ પેદા કરી શકે છે. લોકોને વિનંતી છે કે તેઓ અફવાઓનો શિકાર ન બને અને તેને ફેલાવે નહીં. ફક્ત વિશ્વસનીય ન્યૂઝ ચેનલો અને સરકારી સંદેશાઓ પર જ વિશ્વાસ કરે."