બિક્રમ સિંહ મજીઠિયાને 14 દિવસની ન્યાયિક કસ્ટડીમાં મોકલાયા

પંજાબના ભૂતપૂર્વ મંત્રી અને શિરોમણી અકાલી દળના વરિષ્ઠ નેતા બિક્રમ સિંહ મજીઠિયાને મોહાલી કોર્ટે 14 દિવસની ન્યાયિક કસ્ટડીમાં મોકલી આપ્યા છે. રવિવારે તેમના પોલીસ રિમાન્ડ પૂરા થયા બાદ તેમને કોર્ટમાં રજૂ કરવામાં આવ્યા હતા. હવે મજીઠિયાને કડક સુરક્ષા વચ્ચે નાભાની નવી જેલમાં મોકલવામાં આવ્યા છે, જ્યાં તેઓ 19 જુલાઈ સુધી રહેશે.

ડ્રગ મની લોન્ડરિંગ કેસમાં ધરપકડ

ડ્રગ મની લોન્ડરિંગ અને 540 કરોડ રૂપિયાથી વધુની અપ્રમાણસર સંપત્તિના કથિત કેસમાં 25 જૂનના રોજ નોંધાયેલી એફઆઈઆર બાદ વિજિલન્સ બ્યુરો દ્વારા બિક્રમ સિંહ મજીઠિયાની ધરપકડ કરવામાં આવી હતી. પંજાબ વિજિલન્સ બ્યુરોએ તેમની અમૃતસર સ્થિત તેમના ઘરેથી ધરપકડ કરી હતી. ધરપકડના બીજા દિવસે, કોર્ટે તેમને 7 દિવસના રિમાન્ડ પર મોકલ્યા હતા, જે બાદમાં વધુ 4 દિવસ માટે લંબાવવામાં આવ્યા હતા. હાલમાં, રિમાન્ડ પૂરા થયા પછી, મજીઠિયા રવિવારે રજાના દિવસે મોહાલી કોર્ટમાં હાજર થયા હતા.

સરકારી વકીલ ફેરી સોફાટે ન્યૂઝ એજન્સીને જણાવ્યું હતું કે, "કુલ રિમાન્ડ 15 દિવસનો હતો. 12 દિવસ પસાર થઈ ગયા છે, પરંતુ વિજિલન્સ વિભાગે 3 દિવસ રિઝર્વ રાખ્યા છે જેથી જરૂર પડે તો પૂછપરછ પછી કરી શકાય." વકીલે કહ્યું કે વિજિલન્સ ટીમો ઘણી અલગ અલગ જગ્યાએ દરોડા પાડી રહી છે. દસ્તાવેજો મળી આવ્યા બાદ, મજીઠિયાને ફરીથી રિમાન્ડ પર લઈ શકાય છે.

બિક્રમ સિંહ મજીઠિયાને કડક સુરક્ષા વચ્ચે મોહાલી કોર્ટમાં લાવવામાં આવ્યા હતા. વાહનોના કાફલા ઉપરાંત, રસ્તા પર વિવિધ સ્થળોએ પોલીસ તૈનાત કરવામાં આવી હતી. આ દરમિયાન, મજીઠિયા સમર્થકો અને અકાલી દળના કાર્યકરોએ કોર્ટ સુધી પહોંચવાનો પ્રયાસ કર્યો, જેમને રસ્તામાં રોકવામાં આવ્યા હતા. મજીઠિયાને 19 જુલાઈ સુધી નાભા જેલમાં મોકલવામાં આવ્યા છે.