બીજાપુરમાં DRGને મળી મોટી સફળતા, 4 નક્સલી ઠાર

છત્તીસગઢના બીજાપુરમાં સ્પેશિયલ પોલીસ ફોર્સ (DRG)ને મોટી સફળતા મળી છે. DRG એ એક એન્કાઉન્ટર દરમિયાન ચાર નક્સલીઓને ઠાર કર્યા. આ નક્સલીઓમાં દક્ષિણ સબ ઝોનલ બ્યુરોના ACM સ્તરના ત્રણ ટોચના નક્સલીઓ અને એક પાર્ટી સભ્યનો સમાવેશ થાય છે. બીજાપુરની DRG ટીમ દ્વારા હાથ ધરવામાં આવેલા સર્ચ ઓપરેશન દરમિયાન આ એન્કાઉન્ટર થયું હતું.

પોલીસ અધિકારીઓના જણાવ્યા અનુસાર, માર્યા ગયેલા નક્સલીઓની ઓળખ હુંગા, લક્કે, ભીમા અને નિહાલ ઉર્ફે રાહુલ તરીકે થઈ છે. ભીમા, હુંગા અને લક્કે નક્સલીઓ પર 5-5 લાખ રૂપિયાનું ઈનામ જાહેર કરવામાં આવ્યું હતું. નિહાલ ઉર્ફે રાહુલ પર 2 લાખ રૂપિયાનું ઈનામ રાખવામાં આવ્યું હતું.   

બીજાપુરના પોલીસ અધિક્ષક જિતેન્દ્ર યાદવના જણાવ્યા અનુસાર, જિલ્લાના દક્ષિણ-પશ્ચિમ ક્ષેત્રમાં માઓવાદી કેડરોની ગતિવિધિઓ વિશે વિશ્વસનીય માહિતીના આધારે DRG બીજાપુર ટીમે સર્ચ ઓપરેશન શરૂ કર્યું હતું. આ દરમિયાન નક્સલીઓએ DRG ટીમ પર ગોળીબાર કર્યો. આ પછી, પોલીસ દળ અને નક્સલીઓ વચ્ચે લાંબા સમય સુધી અથડામણ ચાલુ રહી. આ અથડામણમાં દક્ષિણ સબ ઝોનલ બ્યુરોના ચાર નક્સલીઓ માર્યા ગયા. સ્થળ પરથી SLR, INSAS, .303 રાઇફલ, BGL લોન્ચર, સિંગલ શોટ રાઇફલ, મોટી માત્રામાં દારૂગોળો, ગ્રેનેડ અને અન્ય નક્સલી સામગ્રી જપ્ત કરવામાં આવી છે.

બસ્તર રેન્જના પોલીસ મહાનિરીક્ષક સુંદરરાજે જણાવ્યું હતું કે સુરક્ષા દળો દ્વારા ચલાવવામાં આવી રહેલા અભિયાન હેઠળ વર્ષ 2024 થી કુલ 425 હાર્ડકોર નક્સલીઓ માર્યા ગયા છે. બસ્તર વિભાગમાં પ્રતિબંધિત અને ગેરકાયદેસર માઓવાદી સંગઠન સામે સુરક્ષા દળો દ્વારા સઘન અને સતત કાર્યવાહી હાથ ધરવામાં આવી રહી છે. તેમણે કહ્યું કે મુશ્કેલ ચોમાસાની સ્થિતિ, દુર્ગમ જંગલો અને જોખમી રસ્તાઓ છતાં, સુરક્ષા દળોનું મનોબળ ઊંચું છે અને તેઓ નક્સલવાદી સંગઠન સામે સતત નિર્ણાયક પ્રગતિ કરી રહ્યા છે.