ભારતે શ્રીલંકામાં 12 ટન વધારાની રાહત સામગ્રી મોકલી; ચક્રવાત 'દિત્વાહા'માં 69ના મોત

ચક્રવાત 'દિત્વાહા'ને કારણે શ્રીલંકામાં અત્યાર સુધીમાં  69 લોકોના મોત થયા છે અને 34 લોકો ગુમ થયા છે. આ માનવતાવાદી કટોકટી વચ્ચે, ભારતે પોતાના 'ઓપરેશન સાગર બંધુ' હેઠળ શ્રીલંકાને 12 ટન વધારાની રાહત સામગ્રી મોકલી છે. ભારતીય વાયુસેનાનું એક વિમાન શનિવારે કોલંબોમાં ઉતર્યું હતું.

વિદેશ મંત્રી એસ. જયશંકરે સોશિયલ મીડિયા પ્લેટફોર્મ 'X' પર આ અંગેની માહિતી આપી હતી. તેમણે જણાવ્યું હતું કે, "ઓપરેશન સાગર બંધુ શરૂ થઈ ગયું છે. ભારતીય વાયુસેનાનું C-130J વિમાન આશરે 12 ટન માનવતાવાદી સહાય (HADR), જેમાં તંબુ, તાડપત્રી, ધાબળા, સ્વચ્છતા કીટ અને તૈયાર ભોજનનો સમાવેશ થાય છે, લઈને કોલંબો પહોંચ્યું છે."

આ શનિવારની સહાય અગાઉ, ભારતે શુક્રવારે પણ ઓપરેશન સાગર બંધુ હેઠળ શ્રીલંકાને સહાય મોકલી હતી.શ્રીલંકામાં ભારતીય હાઈ કમિશનરે X પર પોસ્ટ કરીને ભારતીય નૌકાદળ દ્વારા પૂરી પાડવામાં આવેલી સહાયની વિગતો આપી હતી:"ચક્રવાત દિત્વા પછી શ્રીલંકાને તાત્કાલિક HADR સહાય પૂરી પાડવામાં આવી રહી છે. અસરગ્રસ્ત પરિવારોને મદદ કરવા માટે ભારતે ભારતીય નૌકાદળના જહાજ (INS) વિક્રાંત અને INS ઉદયગિરીથી  4.5 ટન સૂકું રાશન, 2 ટન તાજું રાશન અને અન્ય આવશ્યક રાહત વસ્તુઓ પૂરી પાડી."

પ્રધાનમંત્રી નરેન્દ્ર મોદીએ ચક્રવાતથી થયેલા મૃત્યુ પ્રત્યે ઊંડી સંવેદના વ્યક્ત કરી હતી. તેમણે X પર લખ્યું હતું કે, "ચક્રવાત દિત્વાહાને કારણે પોતાના પ્રિયજનો ગુમાવનારા શ્રીલંકાના લોકો પ્રત્યે મારી ઊંડી સંવેદના છે. હું તમામ અસરગ્રસ્ત પરિવારોની સલામતી, પુનર્વસન અને ઝડપી સ્વસ્થતા માટે પ્રાર્થના કરું છું."તેમણે ઉમેર્યું હતું કે, "આપણા નજીકના દરિયાઈ પાડોશી સાથે એકતામાં, ભારતે ઓપરેશન સાગર બંધુ હેઠળ તાત્કાલિક રાહત સામગ્રી અને આવશ્યક HADR સહાય મોકલી છે. ભારતની નેબરહુડ ફર્સ્ટ (પડોશી પ્રથમ) નીતિ અને વિઝન સાગર અનુસાર, ભારત જરૂરિયાતના સમયે શ્રીલંકાની સાથે મજબૂત રીતે ઉભું છે."