ભારત-માલદીવ્સ સંયુક્ત લશ્કરી કવાયત એકુવેરીન કેરળમાં શરૂ

ભારતીય સેના અને માલદીવ્સ રાષ્ટ્રીય સંરક્ષણ દળ (MNDF) વચ્ચેની સંયુક્ત લશ્કરી કવાયત 'એકુવેરીન'ની 14મી આવૃત્તિ મંગળવારથી કેરળના તિરુવનંતપુરમમાં શરૂ થઈ.આ સંયુક્ત કવાયત 2 થી 15 ડિસેમ્બર, 2025 સુધી ચાલશે.

કવાયતમાં ગઢવાલ રાઇફલ્સની બટાલિયન દ્વારા રજૂ કરાયેલ 45 જવાનોની ભારતીય સેનાની ટુકડી અને માલદીવ્સ રાષ્ટ્રીય સંરક્ષણ દળની સમાન તાકાતની માલદીવિયન ટુકડી ભાગ લઈ રહી છે.'એકુવેરીન' (Ekuverin) શબ્દનો અર્થ દિવેહી ભાષામાં "મિત્ર" થાય છે, જે બંને દેશો વચ્ચેની મિત્રતા, પરસ્પર વિશ્વાસ અને લશ્કરી સહયોગના ઊંડા બંધનોને પ્રતિબિંબિત કરે છે."પડોશી પ્રથમ" નીતિ: 2009 થી બંને દેશોમાં વારાફરતી આયોજિત આ કવાયત ભારતની "પડોશી પ્રથમ" નીતિ અને મિત્ર દેશો સાથે કાયમી સંરક્ષણ ભાગીદારી બનાવવાની પ્રતિબદ્ધતાનું ઉદાહરણ છે.

સંરક્ષણ મંત્રાલય અનુસાર, બે અઠવાડિયા લાંબી આ કવાયતનો ઉદ્દેશ્ય જંગલ, અર્ધ-શહેરી અને દરિયાકાંઠાના પ્રદેશોમાં બળવાખોરી વિરોધી (Counter-Insurgency) અને આતંકવાદ વિરોધી (Counter-Terrorism) કામગીરીમાં આંતર-કાર્યક્ષમતા અને ઓપરેશનલ સિનર્જી વધારવાનો છે.બંને પક્ષોના સૈનિકો આ ક્ષેત્રમાં સામાન્ય સુરક્ષા પડકારોનો સામનો કરવા માટે શ્રેષ્ઠ પ્રથાઓ, વ્યૂહાત્મક કવાયતો અને સંયુક્ત ઓપરેશનલ પ્લાનિંગમાં ભાગ લેશે.