મંત્રીમંડળે 28,840 કરોડના ખર્ચ સાથે સુધારેલી ઉડાન યોજનાને મંજૂરી આપી, 100 એરપોર્ટ વિકસાવવામાં આવશે

પ્રધાનમંત્રી નરેન્દ્ર મોદીની અધ્યક્ષતામાં મળેલી કેબિનેટ બેઠકમાં પ્રાદેશિક કનેક્ટિવિટી વધારવા માટે એક મહત્વપૂર્ણ નિર્ણય લેવામાં આવ્યો છે.

કેન્દ્ર સરકારે 28,840 કરોડના કુલ ખર્ચ સાથે આગામી 10 વર્ષ માટે ‘રીઝનલ કનેક્ટિવિટી સ્કીમ (RCS) - સુધારેલી ઉડાન યોજના’ને મંજૂરી આપી છે. આ યોજના નાણાકીય વર્ષ 2026-27 થી 2035-36 સુધી અમલમાં રહેશે.

ટીયર-2 અને ટીયર-3 શહેરોમાં કનેક્ટિવિટી વધશે

આ નિર્ણયથી દેશના અંતરિયાળ અને પહાડી વિસ્તારોમાં હવાઈ સંપર્ક સુધરશે. ખાસ કરીને ટીયર-2 અને ટીયર-3 શહેરોમાં આર્થિક વિકાસ, વેપાર અને પ્રવાસનને વેગ મળશે. સામાન્ય નાગરિકો માટે સસ્તી હવાઈ મુસાફરી સુલભ બનશે અને કટોકટીના સમયે આરોગ્ય સેવાઓ સુધી પહોંચવામાં સરળતા રહેશે. આ યોજના ‘વિકસિત ભારત 2047’ના લક્ષ્યને પ્રાપ્ત કરવામાં મહત્વની ભૂમિકા ભજવશે.

100 એરપોર્ટ અને 200 હેલિપેડનું નિર્માણ

સુધારેલી ઉડાન યોજના હેઠળ, હાલમાં ઓછી સુવિધા ધરાવતી અથવા વણવપરાયેલી હવાઈ પટ્ટીઓ પર 100 નવા એરપોર્ટ વિકસાવવાનું આયોજન છે. આ માટે આગામી 8 વર્ષમાં 12,159 કરોડનો ખર્ચ કરવામાં આવશે. આ ઉપરાંત, પહાડી અને ટાપુ વિસ્તારોમાં સંપર્ક સુધારવા માટે ₹3,661 કરોડના ખર્ચે 200 આધુનિક હેલિપેડ બનાવવામાં આવશે.

ઓપરેશનલ અને મેન્ટેનન્સ સહાય

નાના એરપોર્ટ પર મર્યાદિત આવક અને ઊંચા ખર્ચને ધ્યાનમાં રાખીને, સરકાર ત્રણ વર્ષ માટે ઓપરેશનલ અને મેન્ટેનન્સ (O&M) સહાય પૂરી પાડશે.

એરપોર્ટ દીઠ: વાર્ષિક મહત્તમ ₹3.06 કરોડની સહાય.

હેલિપોર્ટ/વોટર એરોડ્રોમ દીઠ: વાર્ષિક મહત્તમ ₹0.90 કરોડની સહાય.
આશરે 441 એરપોર્ટ માટે કુલ 2,577 કરોડની જોગવાઈ કરવામાં આવી છે.

એરલાઇન ઓપરેટરોને આર્થિક ટેકો

બજારના લાંબા ગાળાના વિકાસ માટે એરલાઇન ઓપરેટરોને આગામી 10 વર્ષમાં ₹10,043 કરોડની 'વાયેબિલિટી ગેપ ફંડિંગ' (VGF) સહાય આપવામાં આવશે. આ સાથે જ, નાના વિમાનોની અછત દૂર કરવા માટે પવન હંસ માટે બે 'HAL ધ્રુવ' હેલિકોપ્ટર અને એલાયન્સ એર માટે બે 'HAL ડોર્નિયર' વિમાન ખરીદવાનો પણ પ્રસ્તાવ છે.આ યોજના હેઠળ સરકારનું મુખ્ય ધ્યાન અંતિમ છેવાડાના વિસ્તારો સુધી કનેક્ટિવિટી પહોંચાડવા અને દેશના એરોસ્પેસ ક્ષેત્રને આત્મનિર્ભર બનાવવા પર છે.