રાષ્ટ્રપતિ અને પ્રધાનમંત્રીએ દેશવાસીઓને ઈદની શુભેચ્છા પાઠવી

આજે સમગ્ર ભારતમાં ઈદ-ઉલ-ફિત્રનો તહેવાર ખૂબ જ ઉત્સાહથી ઉજવવામાં આવી રહ્યો છે. વહેલી સવારથી જ મુસ્લિમ સમુદાયના સભ્યો દેશની મસ્જિદોમાં નમાજ અદા કરવા માટે ઉમટી પડ્યા છે. લોકો એકબીજાને ભેટી રહ્યા છે અને ઈદની શુભેચ્છાઓ પાઠવી રહ્યા છે. રાષ્ટ્રપતિ દ્રૌપદી મુર્મુ અને પ્રધાનમંત્રી નરેન્દ્ર મોદીએ પણ નાગરિકોને ઈદની શુભેચ્છાઓ પાઠવી છે.

'X' પર એક પોસ્ટમાં રાષ્ટ્રપતિ દ્રૌપદી મુર્મુએ લખ્યું કે, "તમામ નાગરિકોને ખાસ કરીને મારી મુસ્લિમ બહેનો અને ભાઈઓને ઈદ-ઉલ-ફિત્રના શુભ અવસર પર હાર્દિક શુભેચ્છાઓ. આ તહેવાર આપણને સમાજના વંચિત વર્ગો પ્રત્યે આત્મસંયમ, સેવા, પરોપકાર અને કરુણાના મૂલ્યો શીખવે છે. આ પ્રસંગે ચાલો આપણે આપણા સમાજ અને આપણા રાષ્ટ્રને મજબૂત બનાવવા માટે કામ કરવાનો સંકલ્પ કરીએ."

પ્રધાનમંત્રી નરેન્દ્ર મોદીએ 'X' પર એક પોસ્ટમાં લખ્યું કે, "ઈદ-ઉલ-ફિત્ર પર હાર્દિક શુભેચ્છાઓ. આ દિવસ ભાઈચારો અને સંવાદિતાની ભાવનાને વધુ પ્રોત્સાહન આપે. દરેક વ્યક્તિ ખુશ અને સ્વસ્થ રહે."

ઉપરાષ્ટ્રપતિ સી.પી. રાધાકૃષ્ણને ઈદની શુભકામના પાઠવતા 'X' પર એક પોસ્ટમાં લખ્યું કે, "આ શુભ પ્રસંગ આશા, સંવાદિતા અને કરુણાને પ્રેરણા આપે અને ખુશી-સફળતા લાવે."

કેન્દ્રીય સંસદીય બાબતો અને લઘુમતી બાબતોના મંત્રી રિજિજુએ 'X' પર એક પોસ્ટમાં લખ્યું કે, "ઈદ-ઉલ-ફિત્ર પર દરેકને હાર્દિક શુભેચ્છાઓ! આ ખાસ દિવસ બધા માટે ખુશી, સમૃદ્ધિ અને નવી તકો લાવે. ચાલો આપણે આ પ્રસંગને આપણા પ્રિયજનો સાથે એકતા અને કૃતજ્ઞતાની ભાવના સાથે ઉજવીએ."

બિહારના મુખ્યમંત્રી નીતિશ કુમારે પણ ઈદના અવસર પર શુભેચ્છાઓ પાઠવી છે. X પર એક પોસ્ટમાં તેમણે લખ્યું કે, "ઈદના શુભ અવસર પર, હું રાજ્ય અને રાષ્ટ્રના લોકોને ખાસ કરીને મારા મુસ્લિમ ભાઈઓ અને બહેનોને હાર્દિક શુભેચ્છાઓ અને શુભકામનાઓ પાઠવું છું."