વિદેશી નિર્ભરતા આપણી સૌથી મોટી દુશ્મન, ભારતે આ દુશ્મનને હરાવવો જ પડશે: પ્રધાનમંત્રી

ભાવનગર: પ્રધાનમંત્રી નરેન્દ્ર મોદીએ ફરી એકવાર 'આત્મનિર્ભર ભારત'ના સંકલ્પનો પુનરોચ્ચાર કર્યો છે. તેમણે કહ્યું કે વિશ્વમાં શાંતિ, સ્થિરતા અને સમૃદ્ધિ માટે દુનિયાના સૌથી વધુ વસ્તી ધરાવતા દેશને આત્મનિર્ભર બનવું જ પડશે. ભારતમાં ક્ષમતાની કોઈ કમી નથી.

પ્રધાનમંત્રી  મોદી શનિવારે ભાવનગરમાં આયોજિત 'સમુદ્રથી સમૃદ્ધિ' કાર્યક્રમમાં ઉપસ્થિત રહ્યા હતા. તેમણે કહ્યું કે આ કાર્યક્રમ ભલે ભાવનગરમાં થઈ રહ્યો હોય, પરંતુ આ કાર્યક્રમ સમગ્ર હિન્દુસ્તાનનો છે. સમગ્ર ભારતમાં સમુદ્રથી સમૃદ્ધિ તરફ જવાની આપણી દિશા શું છે, તે માટે આ મહત્વપૂર્ણ કાર્યક્રમનું કેન્દ્ર ભાવનગરને પસંદ કરવામાં આવ્યું છે. આ દરમિયાન, પીએમ મોદીએ ગુજરાત અને ભાવનગરના લોકોને અભિનંદન પાઠવ્યા.

તેમણે કહ્યું કે 21મી સદીનું ભારત સમુદ્રને એક બહુ મોટી તક તરીકે જોઈ રહ્યું છે. અહીં પોર્ટ લેડ ડેવલપમેન્ટને ગતિ આપવા માટે હજારો કરોડ રૂપિયાના પ્રોજેક્ટ્સનો શિલાન્યાસ અને ઉદ્ઘાટન કરવામાં આવ્યા છે.

'આત્મનિર્ભર ભારત'નો સંદેશ આપતા પ્રધાનમંત્રી મોદીએ કહ્યું કે ભારત આજે 'વિશ્વબંધુ'ની ભાવનાથી આગળ વધી રહ્યું છે. દુનિયામાં આપણો કોઈ મોટો દુશ્મન નથી. તેમણે કહ્યું, "સાચા અર્થમાં જો આપણો કોઈ દુશ્મન હોય તો તે છે બીજા દેશો પર આપણી નિર્ભરતા. આ જ આપણો સૌથી મોટો દુશ્મન છે અને આપણે સૌએ મળીને ભારતના આ દુશ્મનને હરાવવો જ પડશે."

કાર્યક્રમને સંબોધતા પ્રધાનમંત્રી  મોદીએ કહ્યું, "જેટલી વધુ વિદેશી નિર્ભરતા હશે, તેટલી જ દેશની નિષ્ફળતા હશે. વિશ્વમાં શાંતિ, સ્થિરતા અને સમૃદ્ધિ માટે દુનિયાના સૌથી વધુ વસ્તી ધરાવતા દેશને આત્મનિર્ભર બનવું જ પડશે."

આ દરમિયાન, પ્રધાનમંત્રી  નરેન્દ્ર મોદીએ કોંગ્રેસને નિશાને લીધી. તેમણે કહ્યું, "ભારતમાં ક્ષમતાની કોઈ કમી નથી, પરંતુ આઝાદી પછી કોંગ્રેસે ભારતની દરેક ક્ષમતાને નજરઅંદાજ કરી, તેથી આઝાદીના 6-7 દાયકાઓ પછી પણ ભારત તે સફળતા હાંસલ કરી શક્યું નહીં, જેના આપણે હકદાર હતા. લાંબા સમય સુધી કોંગ્રેસ સરકારે દેશને લાયસન્સ કોટા રાજમાં ફસાવી રાખ્યો. દુનિયાના બજારથી અલગ-થલગ રાખ્યો. કોંગ્રેસ સરકારની નીતિઓએ દેશના યુવાનોને ઘણું નુકસાન પહોંચાડ્યું."

17 સપ્ટેમ્બરે જન્મદિવસ પછી પ્રથમ વખત પ્રધાનમંત્રી મોદી પોતાના ગૃહ રાજ્ય ગુજરાત પહોંચ્યા હતા. તેમણે કાર્યક્રમમાં કહ્યું, "તમે સૌએ પોતાના નરેન્દ્રભાઈને જે શુભકામનાઓ મોકલી છે, દેશ અને દુનિયામાંથી જે મને શુભકામનાઓ મળી છે, વ્યક્તિગત રીતે સૌનો આભાર માનવો શક્ય નથી, પરંતુ ભારતના ખૂણે-ખૂણેથી અને વિશ્વભરમાંથી જે આ પ્રેમ અને આશીર્વાદ મળ્યો છે, તે મારી સૌથી મોટી સંપત્તિ અને સૌથી મોટી તાકાત છે. તેથી હું સાર્વજનિક રીતે દેશ અને દુનિયાના તમામ મહાનુભાવોનો હૃદયપૂર્વક આભાર વ્યક્ત કરું છું."