શ્રીનગરમાં લઘુત્તમ તાપમાન માઈનસ 3.9 ડિગ્રી સેલ્સિયસ નોંધાયું

સમગ્ર કાશ્મીરમાં તાપમાન શૂન્યથી ઘણું નીચે છે. બુધવારે રાત્રે શ્રીનગરમાં લઘુત્તમ તાપમાન માઈનસ 3.9 ડિગ્રી સેલ્સિયસ નોંધાયું હતું, જે પાછલી રાત્રે માઈનસ 5.2 ડિગ્રી સેલ્સિયસ હતું. હાડ થીજવતી ઠંડીના કારણે દાલ તળાવના આંતરિક ભાગ સહિત અનેક જળાશયો થીજી ગયા છે.

હવામાન વિભાગના જણાવ્યા અનુસાર, દક્ષિણ કાશ્મીરમાં શોપિયાન ગઈકાલે રાત્રે ખીણનું સૌથી ઠંડુ સ્થળ હતું, જ્યાં તાપમાન માઈનસ 6.1 ડિગ્રી સેલ્સિયસ હતું, જે એક દિવસ પહેલા માઈનસ 7.5 ડિગ્રી સેલ્સિયસ હતું. પુલવામામાં પણ લઘુત્તમ તાપમાન માઈનસ 6.1 ડિગ્રી સેલ્સિયસ નોંધાયું હતું. દક્ષિણ કાશ્મીરના પર્યટન સ્થળ અને વાર્ષિક અમરનાથ યાત્રા માટેના બેઝ કેમ્પમાંના એક પહેલગામમાં લઘુત્તમ તાપમાન માઈનસ 5.0 ડિગ્રી સેલ્સિયસ નોંધાયું હતું.

અધિકારીઓએ જણાવ્યું હતું કે, ઉત્તર કાશ્મીરના બારામુલ્લા જિલ્લામાં આવેલા લોકપ્રિય સ્કી રિસોર્ટ ગુલમર્ગમાં તાપમાન માઈનસ 3.2 ડિગ્રી સેલ્સિયસ હતું, જ્યારે મધ્ય કાશ્મીરના ગાંદરબલ જિલ્લામાં આવેલા સોનામર્ગમાં માઈનસ 5.8 ડિગ્રી સેલ્સિયસ નોંધાયું હતું. ખીણના પ્રવેશદ્વાર ગણાતા કાઝીગુંડમાં તાપમાન માઈનસ 4.7 ડિગ્રી સેલ્સિયસ હતું. કોકરનાગમાં માઈનસ 1.1 ડિગ્રી સેલ્સિયસ અને કુપવાડામાં માઈનસ 4.9 ડિગ્રી સેલ્સિયસ તાપમાન નોંધાયું હતું.

કાશ્મીર ખીણ હાલમાં 40 દિવસના સૌથી કઠોર શિયાળાના સમયગાળા, 'ચિલ્લા-એ-કલન'ની વચ્ચે છે, જે દરમિયાન રાત્રિનું તાપમાન ઘણીવાર શૂન્યથી ઘણા ડિગ્રી નીચે જાય છે અને હિમવર્ષા થવાની સંભાવના સૌથી વધુ છે. ગયા વર્ષે 21 ડિસેમ્બરથી શરૂ થયેલ 'ચિલ્લા-એ-કલાં' 30 જાન્યુઆરીએ સમાપ્ત થશે. ભારતીય હવામાન વિભાગે જણાવ્યું છે કે, પશ્ચિમી વિક્ષેપ કાશ્મીરની નજીક આવી રહ્યો છે અને 16 જાન્યુઆરીથી ખીણને અસર કરે તેવી શક્યતા છે.