શ્રીહરિકોટાથી ISROના LVM-3M6 મિશનનું સફળતાપૂર્વક લોન્ચિંગ

ભારતીય અવકાશ સંશોધન સંગઠન (ISRO)એ ફરી એકવાર અવકાશ ક્ષેત્રે ભારતનું ગૌરવ વધાર્યું છે. ઈસરોના સૌથી શક્તિશાળી લોન્ચ વ્હીકલ LVM3-M6 એ સવારે 8:54 કલાકે સતીશ ધવન સ્પેસ સેન્ટરથી સફળતાપૂર્વક ઉડાન ભરી હતી.

આ મિશન હેઠળ યુએસ સ્થિત 'AST સ્પેસ મોબાઇલ' ના બ્લુબર્ડ બ્લોક-2 (BlueBird Block-2) ઉપગ્રહને તેની નિર્ધારિત ભ્રમણકક્ષામાં સ્થાપિત કરવામાં આવ્યો છે.આ ઐતિહાસિક ક્ષણના સાક્ષી બનવા માટે મોટી સંખ્યામાં શાળાના વિદ્યાર્થીઓ શ્રીહરિકોટા પહોંચ્યા હતા. રોકેટ લોન્ચિંગ જોઈને વિદ્યાર્થીઓમાં ભારે રોમાંચ જોવા મળ્યો હતો.

લોન્ચિંગ જોવા આવેલી એક વિદ્યાર્થીનીએ જણાવ્યું કે, "અમે 30 વિદ્યાર્થીઓના જૂથ સાથે અહીં આવ્યા છીએ. ઈસરોની આ કામગીરી પ્રશંસનીય છે. અમને અહીં વિજ્ઞાન અને ટેકનોલોજી વિશે ઘણું શીખવા મળશે, ખાસ કરીને રોકેટ કેવી રીતે કાર્ય કરે છે તેની પ્રક્રિયા સમજવાની આ ઉત્તમ તક છે." અન્ય એક વિદ્યાર્થીએ પોતાની ખુશી વ્યક્ત કરતા શાળા વહીવટનો આભાર માન્યો હતો અને જણાવ્યું હતું કે આ પ્રવાસથી તેમને અવકાશ વિજ્ઞાન અને પ્રક્ષેપણ પ્રક્રિયાને નજીકથી જોવાનો મોકો મળ્યો છે.

 6.5 ટન વજન ધરાવતો બ્લુબર્ડ બ્લોક-2 ઉપગ્રહ LVM-3 રોકેટના ઇતિહાસમાં લો અર્થ ઓર્બિટ (LEO) માં પ્રક્ષેપિત કરવામાં આવેલો અત્યાર સુધીનો સૌથી ભારે પેલોડ છે. આ ઉપગ્રહ આગામી પેઢીની સંચાર વ્યવસ્થા માટે તૈયાર કરવામાં આવ્યો છે, જે વિશ્વભરના સ્માર્ટફોન પર સીધું હાઇ-સ્પીડ સેલ્યુલર બ્રોડબેન્ડ પ્રદાન કરશે.આ મિશન ભારત અને અમેરિકા વચ્ચેના વધતા અવકાશ સહયોગનું પ્રતીક છે. આ અગાઉ જુલાઈમાં ઈસરોએ NASA-ISRO સિન્થેટિક એપર્ચર રડાર (NISAR) મિશન પર પણ સાથે કામ કર્યું છે.LVM3 રોકેટે અગાઉ પણ ભારતની મહત્વકાંક્ષી યોજનાઓ જેવી કે ચંદ્રયાન-2, ચંદ્રયાન-3 અને બ્રિટિશ કંપની વનવેબ (OneWeb) ના 72 ઉપગ્રહોને સફળતાપૂર્વક લોન્ચ કરીને પોતાની વિશ્વસનીયતા સાબિત કરી છે. 19 ઓક્ટોબરના રોજ અમેરિકાથી ભારત પહોંચેલા બ્લુબર્ડ ઉપગ્રહના સફળ લોન્ચિંગ સાથે ઈસરોએ વૈશ્વિક કોમર્શિયલ માર્કેટમાં પોતાની પકડ મજબૂત કરી છે.