સશસ્ત્ર સેના ધ્વજ દિન : રાજનાથ સિંહે કહ્યું, 'સશસ્ત્ર દળો આપણા માટે મજબૂત સુરક્ષા કવચ છે'

દેશમાં આજે સશસ્ત્ર સેના ધ્વજ દિવસની ઉજવણી કરવામાં આવી રહી છે. આ દિવસ ભારતીય સેના, નેવી અને એરફોર્સના બહાદુર સૈનિકોના સન્માનમાં ઉજવવામાં આવે છે. આ પ્રસંગે કેન્દ્રીય રક્ષા મંત્રી રાજનાથ સિંહે સશસ્ત્ર સેના ધ્વજ દિવસની શુભેચ્છા પાઠવી હતી.

રાજનાથ સિંહે કહ્યું હતું કે, આ અવસર પર હું તમામ સેવા આપતા, નિવૃત્ત સૈનિકો અને તેમના પરિવારોને સલામ કરું છું. તેમજ આ દિવસે તેઓને હૃદયપૂર્વક અભિનંદન પાઠવ્યા હતા. તેમણે કહ્યું કે આ દિવસ આપણા બહાદુર સૈનિકો અને ભૂતપૂર્વ સૈનિકોના અદમ્ય સાહસ, બલિદાન અને સમર્પણને ઓળખવાનો અવસર છે. અમારા સશસ્ત્ર દળો અમારા માટે એક મજબૂત સુરક્ષા કવચ છે, જે દરેક પરિસ્થિતિમાં અમારી સુરક્ષા માટે તૈયાર છે.

કેન્દ્રીય મંત્રીએ વધુમાં જણાવ્યું હતું કે, આપણા દળો માત્ર બાહ્ય હુમલાઓથી જ નહીં પરંતુ કુદરતી આફતો દરમિયાન પણ આપણી સુરક્ષા માટે તૈયાર છે. તેમનું બલિદાન અને અનુશાસન દરેક દેશવાસીઓ માટે પ્રેરણાસ્ત્રોત છે. સશસ્ત્ર દળ ધ્વજ દિવસ આપણને આ સંદેશ આપે છે તેમજ નિવૃત્ત સૈનિકો, તેમના પરિવારો અને બહાદુર મહિલાઓ પ્રત્યેની આપણી જવાબદારીઓ નિભાવવાની તક આપે છે.

નિવૃત્ત સૈનિકો, તેમના પરિવારો અને તેમના બાળકોના કલ્યાણ માટે સરકાર દરેક પગલાં લઈ રહી છે. અમે હંમેશા તેમના શિક્ષણ, તબીબી અને અન્ય સમાન જરૂરિયાતોને પૂર્ણ કરવાનો પ્રયાસ કરીએ છીએ. અમે દેશના નાગરિકો પણ આપણા સૈનિકો સાથે સંબંધિત કલ્યાણકારી કાર્યોને પ્રોત્સાહન આપવા આગળ આવે તેવી અપેક્ષા રાખીએ છીએ. તમારું નાનકડું આર્થિક યોગદાન પણ આપણા એક નિવૃત્ત સૈનિકો અથવા તેમના પરિવાર માટે ખૂબ જ મહત્વપૂર્ણ સાબિત થઈ શકે છે.

તેમણે વધુમાં જણાવ્યું હતું કે, સમાજ કલ્યાણ માટે નાગરિકની જવાબદારી છે કે તે સો હાથે પૈસા કમાય અને હજાર હાથે દાન કરે. તેમણે લોકોને આર્મ્ડ ફોર્સ ફ્લેગ ડે ફંડમાં શક્ય તેટલું યોગદાન આપીને આપણા સૈનિકો પ્રત્યે કૃતજ્ઞતા વ્યક્ત કરવાની અપીલ કરી હતી. ચાલો આપણે બધા સાથે મળીને સુનિશ્ચિત કરીએ કે આપણે પણ આપણા બહાદુર સૈનિકો પ્રત્યે એ જ સમર્પણની ભાવના બતાવીએ, જે આપણા સૈનિકો આપણા દેશવાસીઓ પ્રત્યે ધરાવે છે. 

તમને જણાવી દઈએ કે દર વર્ષે 7 ડિસેમ્બરે દેશમાં સશસ્ત્ર સેના ધ્વજ દિવસની ઉજવણી કરવામાં આવે છે. આ દિવસ ભારતીય સેના, નેવી અને એરફોર્સના બહાદુર સૈનિકોના સન્માનમાં ઉજવવામાં આવે છે. આ દિવસ સશસ્ત્ર દળો અને તેમના પરિવારોના કલ્યાણ માટે ઉજવવામાં આવે છે. આ વર્ષ 1949 થી સતત ઉજવવામાં આવે છે.