સુપ્રીમ કોર્ટ આજે દિલ્હીના સીએમ કેજરીવાલની જામીન અરજી પર સુનાવણી કરશે

સુપ્રીમ કોર્ટ આજે દિલ્હીના મુખ્યમંત્રી અરવિંદ કેજરીવાલની જામીન અરજી પર સુનાવણી કરશે. અરજીમાં સીએમ કેજરીવાલે એક્સાઇઝ પોલિસીમાં કથિત અનિયમિતતાના મામલામાં તેમની ધરપકડને પડકારી છે. તે આ કેસમાં સીબીઆઈ તપાસ હેઠળ છે. જસ્ટિસ સૂર્યકાન્ત અને જસ્ટિસ ઉજ્જવલ ભુયાનની બેંચ સીએમ કેજરીવાલની બે અરજીઓ પર સુનાવણી કરશે, જેમાં તેમની ધરપકડની પુષ્ટિ કરતા અને જામીન આપવાનો ઇનકાર કરતા દિલ્હી હાઈકોર્ટના 5 ઓગસ્ટના નિર્ણયને અલગથી પડકારવામાં આવશે.

દિલ્હી લિકર પોલિસી કૌભાંડ કેસમાં મનીષ સિસોદિયાને જામીન મળ્યા બાદ આમ આદમી પાર્ટીને આશા છે કે કેજરીવાલને પણ જલ્દી જામીન મળી જશે. જણાવી દઈએ કે, સોમવારે જ્યારે સીએમ કેજરીવાલ વતી વરિષ્ઠ વકીલ અભિષેક સિંઘવીએ તાત્કાલિક લિસ્ટિંગની વિનંતી કરી ત્યારે સુપ્રીમ કોર્ટે તેમની અરજી પર સુનાવણી કરવા માટે સંમતિ દર્શાવી હતી.

કેજરીવાલે સોમવારે દાખલ કરેલી અરજીઓમાં, દિલ્હી હાઈકોર્ટના 5 ઓગસ્ટના ચુકાદા પર સવાલ ઉઠાવ્યા હતા, જેમાં કહેવામાં આવ્યું હતું કે તેમની ધરપકડ ન તો ગેરકાયદેસર હતી અને ન તો કોઈ વાજબી કારણ કે CBI તેમની અટકાયત અને રિમાન્ડને યોગ્ય ઠેરવવામાં નિષ્ફળ રહી હતી.કેજરીવાલની અરજીમાં સિસોદિયા કેસમાં સુપ્રીમ કોર્ટના અવલોકનો પર ભાર મૂકવામાં આવ્યો છે. તેમાં કહેવામાં આવ્યું છે કે ટ્રાયલ વિના લાંબા સમય સુધી જેલની સજા એ મૂળભૂત અધિકારોનું ઉલ્લંઘન હોઈ શકે છે. ખાસ કરીને જ્યારે તપાસ મહદઅંશે પૂર્ણ થઈ ગઈ હોય.

કેજરીવાલે તેમની અરજી દ્વારા દલીલ કરી હતી કે તેઓ સિસોદિયા જેવા જ માપદંડો પૂરા કરે છે અને તેથી તેમને આ આધારે જામીન આપવામાં આવે. જણાવી દઈએ કે કેજરીવાલની 21 માર્ચે ED દ્વારા ધરપકડ કરવામાં આવી હતી. જો કે, સુપ્રીમ કોર્ટે તેમને મે મહિનામાં લોકસભા ચૂંટણીના પ્રચાર માટે 21 દિવસ માટે વચગાળાના જામીન આપ્યા હતા.