IRCTCની નવી વેબસાઇટનું બીટા વર્ઝન લોન્ચ, ટિકિટ બુકિંગ થશે ઝડપી અને સરળ

ભારતીય રેલવે કેટરિંગ એન્ડ ટુરિઝમ કોર્પોરેશન(IRCTC)એ તેની નવી ટિકિટ બુકિંગ વેબસાઇટનું બીટા વર્ઝન લોન્ચ કર્યું છે. રેલવે મંત્રાલયે બુધવારે(15 જુલાઈ) જણાવ્યું હતું કે, છેલ્લા બે દાયકામાં વેબસાઇટમાં કરવામાં આવેલો આ પ્રથમ મોટો ફેરફાર છે. નવી વેબસાઇટ હાલમાં બીટા વર્ઝનમાં ઉપલબ્ધ છે. મુસાફરો તેનો ઉપયોગ કરી શકે છે અને તેમના સૂચનો આપી શકે છે. તેનું અંતિમ વર્ઝન આગામી થોડા અઠવાડિયામાં જારી કરવામાં આવશે.

રેલવે મંત્રાલયના જણાવ્યા અનુસાર, નવી વેબસાઇટનું બીટા વર્ઝન હાલની IRCTC વેબસાઇટ પર ઉપલબ્ધ કરાવવામાં આવ્યું છે. આ માટે હોમપેજ પર એક ખાસ લિંક આપવામાં આવી છે, જેના દ્વારા મુસાફરો નવી વેબસાઇટનો ઉપયોગ કરી શકે છે.

આ પહેલ રેલવેની ડિજિટલ ટિકિટિંગ સિસ્ટમને આધુનિક બનાવવા અને મુસાફરો માટે ટિકિટ બુકિંગના અનુભવને વધુ બહેતર બનાવવાના હેતુથી કરવામાં આવી છે. મંત્રાલયે જણાવ્યું કે વેબસાઇટની નવી ડિઝાઇન તૈયાર કરવામાં માલવિયા નેશનલ ઇન્સ્ટિટ્યૂટ ઓફ ટેક્નોલોજીના વિદ્યાર્થીઓના સૂચનોની મહત્વની ભૂમિકા રહી છે.

રેલ મંત્રી અશ્વિની વૈષ્ણવ સાથેની વાતચીત દરમિયાન વિદ્યાર્થીઓએ વેબસાઇટને વધુ યુઝર-ફ્રેન્ડલી બનાવવા માટે સૂચનો આપ્યા હતા. આ સૂચનોમાંથી ઘણાને નવી વેબસાઇટમાં સામેલ કરવામાં આવ્યા છે. IRCTC ની વેબસાઇટ સૌપ્રથમ વર્ષ 2002 માં શરૂ કરવામાં આવી હતી. હાલમાં આ પ્લેટફોર્મ દ્વારા દરરોજ સરેરાશ 14.5 લાખ ટિકિટો બુક કરવામાં આવે છે. નવી વેબસાઇટમાં ક્લીન ઇન્ટરફેસ, સરળ નેવિગેશન અને સરળ ટિકિટ બુકિંગ પ્રક્રિયા ઉપલબ્ધ કરાવવામાં આવી છે.

નવી વેબસાઇટમાં ઘણા એવા ફેરફારો કરવામાં આવ્યા છે જેનાથી ટિકિટ બુકિંગ અગાઉ કરતા વધુ સરળ બની જશે. તેમાં બિનજરૂરી કેપ્ચા, પોપ-અપ્સ, ચમકતા ગ્રાફિક્સ અને અન્ય અવરોધક તત્વોને હટાવી દેવામાં આવ્યા છે. આ ઉપરાંત મુસાફરોને હવે તમામ શ્રેણીઓમાં સીટોની ઉપલબ્ધતા એકસાથે જોવા મળશે, જેથી તેઓ સરળતાથી વિવિધ વિકલ્પોની તુલના કરી શકશે.

રેલવે મંત્રાલયના જણાવ્યા અનુસાર, ટિકિટ બુકિંગ પ્રક્રિયામાં ચેકઆઉટના તબક્કાઓની સંખ્યા ઘટાડી દેવામાં આવી છે. સાથે જ, મુસાફરોની અગાઉથી સેવ કરેલી માહિતી ઉપલબ્ધ રહેવાથી વારંવાર ટિકિટ બુક કરાવતા મુસાફરોને સુવિધા મળશે. મંત્રાલયે કહ્યું કે બીટા વર્ઝન લોન્ચ કરવાનો ઉદ્દેશ્ય મુસાફરો પાસેથી પ્રતિસાદ મેળવવાનો છે. વપરાશકર્તાઓના સૂચનોના આધારે વેબસાઇટમાં વધુ સુધારા કરવામાં આવશે.

નવી વેબસાઇટને રેલવેની નવી પેસેન્જર રિઝર્વેશન સિસ્ટમ સાથે પણ જોડવામાં આવશે, જેને સમાંતર રીતે અપગ્રેડ કરવામાં આવી રહી છે. રેલવે મંત્રાલયના જણાવ્યા અનુસાર, અદ્યતન રિઝર્વેશન સિસ્ટમ અને નવી IRCTC વેબસાઇટનું સંપૂર્ણ વર્ઝન આગામી થોડા અઠવાડિયામાં શરૂ થવાની સંભાવના છે.