PM વિદ્યાલક્ષ્મી યોજનાને મંજૂરી, સસ્તી શિક્ષણ લોન પર કેન્દ્ર સરકારનું મોટું પગલું

PM મોદીની અધ્યક્ષતામાં કેન્દ્રીય કેબિનેટે PM વિદ્યાલક્ષ્મી યોજનાને મંજૂરી આપી છે, જેનો ઉદ્દેશ્ય મધ્યમ વર્ગના વિદ્યાર્થીઓ માટે ઉચ્ચ શિક્ષણ મેળવવામાં નાણાકીય અવરોધો દૂર કરવાનો છે.

આ પહેલ હેઠળ, ઉચ્ચ શિક્ષણ સંસ્થાઓમાં પ્રવેશ લેતા વિદ્યાર્થીઓ કોઈપણ ગેરેંટર (કોલેટરલ) વિના લોન મેળવી શકશે. કેબિનેટની બેઠક બાદ કેન્દ્રીય માહિતી મંત્રી અશ્વિની વૈષ્ણવે આ જાહેરાત કરી હતી. 8 લાખની વાર્ષિક આવક ધરાવતા વિદ્યાર્થીઓ માટે 3 ટકા વ્યાજમાં છૂટ, PM-વિદ્યાલક્ષ્મી પોર્ટલ દ્વારા અરજી કરી શકશે

PM વિદ્યાલક્ષ્મી યોજના હેઠળ દર વર્ષે લગભગ 1 લાખ વિદ્યાર્થીઓ તેમના અભ્યાસ માટે એજ્યુકેશન લોન મેળવી શકશે. જે વિદ્યાર્થીઓની વાર્ષિક કૌટુંબિક આવક 8 લાખ રૂપિયા સુધી છે તેમને 10 લાખ રૂપિયા સુધીની લોન પર ત્રણ ટકા વ્યાજ સબસિડી મળશે. આ સિવાય જે વિદ્યાર્થીઓની વાર્ષિક કૌટુંબિક આવક રૂ. 4.5 લાખ સુધી છે તેમને પહેલાની જેમ વ્યાજમુક્ત ગ્રાન્ટ મળતી રહેશે. સરકાર એ સુનિશ્ચિત કરવા પ્રતિબદ્ધ છે કે કોઈ પણ લાયક વિદ્યાર્થી નાણાકીય સમસ્યાઓના કારણે શિક્ષણથી વંચિત ન રહે. પ્રક્રિયાને સરળ બનાવવા માટે, લોન અરજી, મંજૂરી અને વિતરણ PM-વિદ્યાલક્ષ્મી પોર્ટલ દ્વારા કરવામાં આવશે.

દર વર્ષે, ઉચ્ચ શિક્ષણ વિભાગ આ યોજના હેઠળ પાત્રતા ધરાવતી ઉચ્ચ ગુણવત્તાવાળી સંસ્થાઓની યાદી તૈયાર કરશે. આ યાદીમાં નેશનલ ઇન્સ્ટિટ્યુશનલ રેન્કિંગ ફ્રેમવર્ક (NIRF)ની વિવિધ શ્રેણીઓમાં ટોચની 100 સંસ્થાઓ અને રાજ્ય અથવા કેન્દ્રશાસિત પ્રદેશોની સરકારોની ટોચની 200 સંસ્થાઓનો સમાવેશ થશે. આ સિવાય ભારત સરકાર ઉચ્ચ શિક્ષણ માટે 7.5 લાખ રૂપિયા સુધીની લોન પર 75% ક્રેડિટ ગેરંટી આપશે. આ ધિરાણકર્તાઓ માટે સુરક્ષામાં વધારો કરશે અને વિદ્યાર્થીઓને તેમના શિક્ષણ માટે નાણાકીય સહાય મેળવવાનું સરળ બનાવશે.