દિવાળી પર 'વોકલ ફોર લોકલ'નો ટ્રેન્ડ; પંચમહાલના ગોધરામાં સ્વદેશી દીવડાઓની માંગમાં ભારે ઉછાળો

દિવાળી પર 'વોકલ ફોર લોકલ'નો ટ્રેન્ડ; પંચમહાલના ગોધરામાં સ્વદેશી દીવડાઓની માંગમાં ભારે ઉછાળો

દિવાળીના પવિત્ર તહેવારની તૈયારીઓ પૂરજોશમાં ચાલી રહી છે, ત્યારે પંચમહાલ જિલ્લાના ગોધરા શહેરમાં આ વર્ષે બજારનું ચિત્ર બદલાયું છે. સ્થાનિક કારીગરો દ્વારા હાથથી બનાવવામાં આવેલા સ્વદેશી દીવડા લોકોની પહેલી પસંદ બની રહ્યા છે.

ચાઇનીઝ માલને બદલે સ્વદેશી સ્વીકાર:

અગાઉના વર્ષોમાં બજારમાં ચાઇનીઝ લાઇટ્સ અને આયાતી દીવડાઓનો દબદબો રહેતો હતો. જોકે, હવે લોકો પ્રધાનમંત્રીના "લોકલ ફોર વોકલ" (સ્થાનિક માટે અવાજ)ના સૂત્રને સાર્થક કરીને દેશમાં બનેલા ઉત્પાદનોને અપનાવી રહ્યા છે. આ ટ્રેન્ડના કારણે ગોધરાના બજારોમાં સ્વદેશી દીવડાઓની માંગમાં જબરજસ્ત વધારો જોવા મળ્યો છે.

સ્થાનિક કારીગરોને પ્રોત્સાહન:

સ્થાનિક બજારોમાં કારીગરો દ્વારા માટી, પીતળ અને વિવિધ પ્રકારની હસ્તકલા આધારિત અત્યંત આકર્ષક અને નવીન ડિઝાઇનના દીવડાઓ બનાવવામાં આવ્યા છે. લોકો ઉત્સાહપૂર્વક આ સ્વદેશી ઉત્પાદનો ખરીદી રહ્યા છે. પરિણામે, સ્થાનિક કારીગરોને મોટા પાયે રોજગારી મળી રહી છે અને તેમના આર્થિક જીવનમાં સુધારો થયો છે.

સ્વદેશી દીવડાઓની આ લોકપ્રિયતા માત્ર પરંપરાગતતા જાળવવાનું નહીં, પણ સ્થાનિક અર્થવ્યવસ્થાને મજબૂત બનાવવાનું પણ પ્રતીક બની રહ્યું છે.