અમદાવાદમાં 2030 કોમનવેલ્થ ગેમ્સની ઐતિહાસિક જાહેરાત

અમદાવાદમાં 2030 કોમનવેલ્થ ગેમ્સની ઐતિહાસિક જાહેરાત

ગુજરાત અને સમગ્ર ભારત માટે આજે ગૌરવશાળી અને ઐતિહાસિક દિવસ છે. કોમનવેલ્થ ગેમ્સ ફેડરેશને (Commonwealth Games Federation) 2030ની પ્રતિષ્ઠિત કોમનવેલ્થ ગેમ્સના યજમાન શહેર તરીકે ગુજરાતના અમદાવાદની સત્તાવાર જાહેરાત કરી છે. સ્કોટલેન્ડના ગ્લાસ્ગો ખાતે યોજાયેલી કોમનવેલ્થ ગેમ્સની જનરલ એસેમ્બલીમાં (General Assembly) આ અંતિમ નિર્ણય પર મહોર મારવામાં આવી હતી.

74 સભ્ય દેશોનું મળ્યું સમર્થન

ભારતની મજબૂત દાવેદારીને વિશ્વભરમાંથી સમર્થન મળ્યું હતું. આ બેઠકમાં, ભારતને 74 સભ્ય દેશો અને ક્ષેત્રના પ્રતિનિધિઓનું ભરપૂર સમર્થન મળ્યું હતું, જેના પરિણામે અમદાવાદના નામ પર સહમતિ બની. ગુજરાતના યુવા નાયબ મુખ્યમંત્રી હર્ષ સંઘવીની આગેવાની હેઠળ ભારતનું પ્રતિનિધિમંડળ (Delegation) ગ્લાસ્ગો પહોંચ્યું હતું, જેમણે સફળતાપૂર્વક દેશનું પ્રતિનિધિત્વ કર્યું.

ભારત માટે એક મહત્ત્વપૂર્ણ પગલું

2010માં દિલ્હીમાં આ ગેમ્સનું આયોજન કર્યા બાદ, બે દાયકામાં ભારત ફરી એકવાર આટલી મોટી વૈશ્વિક સ્પોર્ટિંગ ઇવેન્ટનું આયોજન કરશે. ખાસ કરીને છેલ્લા એક દાયકામાં અમદાવાદે તેના રમતગમતના માળખાને (Sports Infrastructure) નોંધપાત્ર રીતે અપગ્રેડ કર્યું છે, જે આ આયોજન માટે મુખ્ય આધાર બન્યું છે.

વૈશ્વિક મલ્ટી-સ્પોર્ટ હબ બનવા તરફ દોટ

અમદાવાદમાં કોમનવેલ્થ ગેમ્સ 2030નું આયોજન એ ભારતની વૈશ્વિક મલ્ટી-સ્પોર્ટ હબ બનવાની મોટી યોજનામાં એક મહત્વપૂર્ણ પગલું છે. આ ઇવેન્ટ વિશ્વ સ્તરે ભારતની વધતી જતી રમતગમતની ક્ષમતા અને આધુનિક ઇન્ફ્રાસ્ટ્રક્ચરનું પ્રદર્શન કરશે. આ નિર્ણયથી ગુજરાત અને દેશના યુવાનોમાં રમતગમતની ભાવના અને ઉત્સાહમાં અનેકગણો વધારો થશે.