ક્રિકેટના ઈતિહાસનો આજે સુવર્ણ દિવસ, સચિન તેંડુલકરે ફટકારી હતી 100મી સદી

ક્રિકેટ જગતમાં જે રેકોર્ડની કલ્પના કરવી પણ અશક્ય હતી, તેને આજે જ એટલે કે 16 માર્ચના રોજ સચિન તેંડુલકરે સાકાર કરી બતાવ્યો હતો. વર્ષ 2012 માં આજના દિવસે માસ્ટર બ્લાસ્ટરે આંતરરાષ્ટ્રીય ક્રિકેટમાં પોતાની 100 મી સદી ફટકારીને એક એવો ઈતિહાસ રચ્યો હતો, જે આજે પણ અકબંધ છે.

મીરપુરનું મેદાન અને તે ઐતિહાસિક પળ:
16 માર્ચ 2012 ના રોજ બાંગ્લાદેશના મીરપુર સ્થિત શેર-એ-બાંગ્લા સ્ટેડિયમમાં ભારત અને બાંગ્લાદેશ વચ્ચે એશિયા કપનો મુકાબલો રમાઈ રહ્યો હતો.

ધૈર્યપૂર્ણ ઈનિંગ: ટોસ હાર્યા બાદ પ્રથમ બેટિંગ કરવા ઉતરેલી ભારતીય ટીમ તરફથી સચિને 147 બોલમાં 114 રનની યાદગાર ઈનિંગ રમી હતી.

અશક્ય રેકોર્ડ: આ સદી સાથે સચિન તેંડુલકર આંતરરાષ્ટ્રીય ક્રિકેટમાં (ટેસ્ટ અને વનડે મળીને) 100 સદી પૂરી કરનાર વિશ્વના એકમાત્ર બેટ્સમેન બન્યા હતા.

છેલ્લું શિખર: ખાસ વાત એ છે કે, આ સચિનના શાનદાર કરિયરની છેલ્લી આંતરરાષ્ટ્રીય સદી પણ સાબિત થઈ હતી.

રેકોર્ડ્સના બાદશાહ: સચિન તેંડુલકર
1989 થી 2013 સુધી ભારતીય બેટિંગ લાઇનઅપના મજબૂત સ્તંભ રહેલા સચિનના નામે ક્રિકેટના અનેક મોટા રેકોર્ડ્સ નોંધાયેલા છે:

વનડેમાં પ્રથમ બેવડી સદી: એકદિવસીય ક્રિકેટમાં સૌપ્રથમ 200 રન બનાવવાનો રેકોર્ડ સચિનના નામે છે.

સૌથી વધુ રન અને મેચ: ટેસ્ટમાં 200 મેચ રમીને 15,921 રન (51 સદી) અને વનડેમાં 463 મેચ રમીને 18,426 રન (49 સદી) નો પહાડ જેવો સ્કોર સચિને બનાવ્યો છે.

વર્લ્ડ કપ વિજેતા: સચિન 2011 માં વર્લ્ડ કપ જીતનારી ભારતીય ટીમનો અભિન્ન હિસ્સો રહ્યા હતા.

ક્રિકેટનો પર્યાય: સચિન
સચિન તેંડુલકરે 16 નવેમ્બર 2013 ના રોજ આંતરરાષ્ટ્રીય ક્રિકેટમાંથી નિવૃત્તિ લીધી હતી. જોકે તેઓ મેદાનથી દૂર છે, પરંતુ તેમની 'સદીઓની સદી' અને બેટિંગની અનોખી શૈલી આજે પણ કરોડો ક્રિકેટ ચાહકો માટે પ્રેરણારૂપ છે. તેમના વનડે રનનો રેકોર્ડ તોડવો ભવિષ્યના ખેલાડીઓ માટે પણ લોઢાના ચણા ચાવવા સમાન છે.