ફિફા વર્લ્ડ કપ 2026: મેસીના રેકોર્ડબ્રેક પ્રદર્શનથી આર્જેન્ટિનાએ ઑસ્ટ્રિયાને 2-0થી હરાવ્યું

ફિફા વર્લ્ડ કપ 2026માં આર્જેન્ટિનાના સ્ટાર ખેલાડી લિયોનેલ મેસીએ ફરી એકવાર પોતાની શાનદાર રમતથી સૌના દિલ જીતી લીધા. મેસીએ બે ગોલ ફટકાર્યા અને અનેક મોટા રેકોર્ડ પોતાના નામે કરતા વર્તમાન ચેમ્પિયન આર્જેન્ટિનાને ઓસ્ટ્રિયા સામે 2-0થી જીત અપાવી. આ જીત સાથે આર્જેન્ટિનાએ નોકઆઉટ રાઉન્ડમાં પણ પોતાની જગ્યા પાક્કી કરી લીધી છે.

પોતાના 39મા જન્મદિવસે મેદાનમાં ઉતરેલા મેસીએ પ્રથમ હાફમાં પેનલ્ટી મિસ કરી હતી, પરંતુ તેનાથી તેમનો આત્મવિશ્વાસ જરાય ડગમગ્યો નહોતો. તેમણે મેચની 38મી મિનિટે ગોલ કરીને આર્જેન્ટિનાને સરસાઈ અપાવી હતી. ત્યારબાદ ઈન્જરી ટાઈમમાં વધુ એક ગોલ કરીને ટીમની જીત સુનિશ્ચિત કરી દીધી. 

ટુર્નામેન્ટના ઈતિહાસમાં સૌથી વધુ વ્યક્તિગત ગોલ કરનાર ખેલાડી
આ મેચ મેસી માટે ઘણી રીતે ખાસ રહી. તેમણે વર્લ્ડ કપમાં પોતાના 17મા અને 18મા ગોલ કર્યા અને ટુર્નામેન્ટના ઇતિહાસમાં સૌથી વધુ વ્યક્તિગત ગોલ કરનાર ખેલાડી બની ગયા. આ પહેલા આ રેકોર્ડ જર્મનીના મિરોસ્લાવ ક્લોઝના નામે હતો, જેમણે 16 ગોલ કર્યા હતા.
 
હવે વર્લ્ડ કપમાં સૌથી વધુ ગોલ કરનાર ખેલાડીઓની યાદીમાં મેસી ટોચ પર પહોંચી ગયા છે. તેમના પછી ક્લોઝ (16) અને બ્રાઝિલના રોનાલ્ડો (15)ના નામ આવે છે. ફ્રાન્સના કિલિયન એમ્બાપ્પે અને જર્મનીના ગર્ડ મુલર 14-14 ગોલ સાથે આગામી સ્થાને છે. 

મેસીએ માત્ર ટુર્નામેન્ટમાં સૌથી વધુ ગોલ કરવાનો રેકોર્ડ જ નથી તોડ્યો, પરંતુ તે સતત છ વર્લ્ડ કપ મેચોમાં ગોલ કરનાર ત્રીજા ખેલાડી પણ બની ગયા છે; તેમના પહેલા ફ્રાન્સના જસ્ટ ફોન્ટેન અને બ્રાઝિલના જૈરઝિન્હોએ આવું કર્યું હતું. આ મેસીનો આ ટુર્નામેન્ટમાં ચોથો ગોલ હતો. 
મેચની શરૂઆતમાં આર્જેન્ટિનાએ આક્રમક રમત બતાવી અને ઘણી તકો બનાવી. જોકે, મેસીની પેનલ્ટી મિસ થયા બાદ ટીમની લય થોડીવાર માટે તૂટી ગઈ હતી. આનો ફાયદો ઉઠાવતા ઓસ્ટ્રિયાએ રમત પર પકડ બનાવવાનો પ્રયાસ કર્યો હતો. ઓસ્ટ્રિયન ખેલાડીઓએ સતત દબાણ બનાવ્યું અને આર્જેન્ટિનાના એટેક રોકવાનો પ્રયાસ કર્યો, પરંતુ તેઓ પોતાની સરસાઈને ગોલમાં બદલી શક્યા નહીં. 

ત્યારબાદ આર્જેન્ટિનાએ ફરી મેચ પર નિયંત્રણ મેળવી લીધું. મેસી અને થિયાગો અલ્માડા વચ્ચે શાનદાર તાલમેલ જોવા મળ્યો હતો. બંને ખેલાડીઓએ મળીને એક શ્રેષ્ઠ મૂવ તૈયાર કર્યો, જેનો અંત મેસીએ શાનદાર ગોલ સાથે કર્યો. આ ગોલથી આર્જેન્ટિનાને 1-0ની સરસાઈ મળવાની સાથે મેસી રેકોર્ડ બુકમાં પણ પહોંચી ગયા. 

હાફ ટાઈમ સુધી આર્જેન્ટિના 1-0થી આગળ હતું. બીજા હાફમાં પણ ટીમે સતત દબાણ જાળવી રાખ્યું હતું. ઓસ્ટ્રિયાએ વાપસીની કોશિશ કરી, પરંતુ આર્જેન્ટિનાના મજબૂત ડિફેન્સ અને મેસીના શાનદાર ફોર્મ સામે તેમની એક પણ ન ચાલી. 

મેચની છેલ્લી ક્ષણોમાં મેસીએ વધુ એક તક ઝડપી અને ઈન્જરી ટાઈમ (90+5 મિનિટ)માં ગોલ કરીને સ્કોર 2-0 કરી દીધો. આ સાથે જ આર્જેન્ટિનાએ જીત સુનિશ્ચિત કરી લીધી. ગ્રુપ જે માં સતત બીજી જીત બાદ આર્જેન્ટિનાએ અંતિમ 32માં પોતાની જગ્યા પાકી કરી લીધી છે. જો દિવસની બીજી મેચમાં જોર્ડન, અલ્જીરિયાને હરાવવામાં નિષ્ફળ રહે છે, તો આર્જેન્ટિના ગ્રુપમાં ટોપ પણ કરી જશે.