વિશ્વ ચેમ્પિયન ભારતીય ટીમનું છત્રપતિ શિવાજી મહારાજ આંતરરાષ્ટ્રીય હવાઈ મથક પર સ્વાગત

મહિલા વિશ્વ કપ 2025ની ચેમ્પિયન બનેલી ભારતીય ક્રિકેટ ટીમનું છત્રપતિ શિવાજી મહારાજ આંતરરાષ્ટ્રીય એરપોર્ટ પર હેડ કોચ અમોલ મજૂમદાર અને કેપ્ટન હરમનપ્રીત કૌરની હાજરીમાં ઉષ્માભર્યું સ્વાગત કરવામાં આવ્યું. વિશ્વ વિજેતા ટીમને પીએમ મોદી સહિતના નેતાઓએ શુભેચ્છાઓ આપી છે, અને મધ્યપ્રદેશ સરકારે રાજ્યની ખેલાડી ક્રાંતિ ગૌડ માટે રૂ.1 કરોડનું ઈનામ જાહેર કર્યું છે.

રવિવારે મહિલા વિશ્વ કપ 2025ની ફાઇનલમાં દક્ષિણ આફ્રિકાને હરાવીને વિશ્વ ચેમ્પિયન બનેલી ભારતીય મહિલા ક્રિકેટ ટીમના ખેલાડીઓનું છત્રપતિ શિવાજી મહારાજ આંતરરાષ્ટ્રીય હવાઈ મથક પર ઉષ્માભર્યું સ્વાગત કરવામાં આવ્યું.

એરપોર્ટ પર ભારતીય ટીમના ખેલાડીઓનું જોરદાર સ્વાગત થયું. ટીમ માટે એક રંગની ગાડીઓ ખાસ કરીને મંગાવવામાં આવી હતી, જે વિશેષ વિમાનની આગળ ચાલી રહી હતી. સૌથી આગળની ગાડી પર તિરંગો લહેરાઈ રહ્યો હતો. ભારતીય ટીમના હેડ કોચ અમોલ મજૂમદારે કેક કાપી. તેમની આસપાસ ટીમના કેપ્ટન હરમનપ્રીત કૌર અને સ્મૃતિ મંધાના સાથે એરપોર્ટના અધિકારીઓ હાજર હતા. તમામ ખેલાડીઓનું બુકે આપીને સ્વાગત કરવામાં આવ્યું.

વિશ્વ ચેમ્પિયન બન્યા બાદ ભારતીય ટીમના ખેલાડીઓને શુભેચ્છાઓ અને ઈનામી રકમ મળવાનો દોર ચાલુ છે. ખિતાબ જીત્યા પછી તરત જ પ્રધાનમંત્રી નરેન્દ્ર મોદી, ગૃહ મંત્રી અમિત શાહ, અન્ય કેન્દ્રીય મંત્રીઓ, રાજ્યના મુખ્યમંત્રીઓ, પૂર્વ ક્રિકેટરો અને સમાજના દરેક ક્ષેત્રના લોકોએ અભિનંદન પાઠવ્યા. રાજ્ય સરકારો વિશ્વ કપની ટીમમાં સામેલ પોતાના ખેલાડીઓ માટે રોકડ પુરસ્કારની ઘોષણા કરી રહી છે. મધ્યપ્રદેશ સરકારે રાજ્યના ખેલાડી ક્રાંતિ ગૌડ માટે 1 કરોડની ઈનામી રકમની ઘોષણા કરી છે.

મહિલા વિશ્વ કપની ફાઇનલ 2 નવેમ્બરના રોજ નવી મુંબઈના ડીવાય પાટિલ ક્રિકેટ સ્ટેડિયમમાં ભારત અને દક્ષિણ આફ્રિકા વચ્ચે રમાઈ હતી.

મેચમાં, દક્ષિણ આફ્રિકાએ પહેલા બેટિંગ કરતા 7 વિકેટે 298 રન બનાવ્યા હતા. ભારત તરફથી શેફાલી વર્માએ 87 અને દીપ્તિ શર્માએ 58 રન બનાવ્યા. દક્ષિણ આફ્રિકા 45.3 ઓવરમાં 246 રન પર ઓલઆઉટ થઈ ગઈ અને 52 રનથી ફાઇનલ મેચ હારી ગઈ. બોલિંગમાં દીપ્તિ શર્માએ 5 અને શેફાલી વર્માએ 2 વિકેટ લીધી.

શેફાલી વર્માને પ્લેયર ઓફ ધ મેચ અને દીપ્તિ શર્માને પ્લેયર ઓફ ધ સીરિઝ જાહેર કરવામાં આવ્યા હતા. દીપ્તિએ ટૂર્નામેન્ટમાં 22 વિકેટ લેવાની સાથે 215 રન પણ બનાવ્યા હતા.