IND vs ENG Test: ઓવલ ટેસ્ટમાં ભારતે ઇંગ્લેન્ડને આપ્યો 374 રનનો લક્ષ્યાંક 

ત્રીજા દિવસે ઇંગ્લેન્ડની બીજી ઇનિંગમાં ફક્ત 13.5 ઓવર રમાઈ શકી. મોહમ્મદ સિરાજે જેક ક્રોલી (14 રન) ને આઉટ કરીને ઇંગ્લેન્ડને પહેલો ઝટકો આપ્યો. બેન ડકેટ ઝડપથી રન બનાવી રહ્યો છે અને 48 બોલમાં 34 રન બનાવીને અણનમ છે.

ભારત અને ઇંગ્લેન્ડ વચ્ચે રમાઈ રહેલી પાંચમી ટેસ્ટ મેચમાં ત્રીજા દિવસની રમત પછી રોમાંચક વળાંક આવ્યો છે. ભારતે ઇંગ્લેન્ડ સામે 374 રનનો વિશાળ લક્ષ્યાંક મૂક્યો છે, જેના જવાબમાં ઇંગ્લેન્ડે 01 વિકેટે 50 રન બનાવી લીધા છે. હવે ઇંગ્લેન્ડને જીતવા માટે 324 રનની જરૂર છે જ્યારે ભારતને 9 વિકેટની જરૂર છે.

ત્રીજા દિવસે ઇંગ્લેન્ડની બીજી ઇનિંગમાં ફક્ત 13.5 ઓવર રમાઈ શકી. મોહમ્મદ સિરાજે જેક ક્રોલી (14 રન) ને આઉટ કરીને ઇંગ્લેન્ડને પહેલો ઝટકો આપ્યો. બેન ડકેટ ઝડપથી રન બનાવી રહ્યો છે અને 48 બોલમાં 34 રન બનાવીને અણનમ છે.

ભારતીય ટીમની બીજી ઇનિંગની શરૂઆત સારી રહી ન હતી. કેએલ રાહુલ (7 રન) અને સાઈ સુદર્શન (11 રન) વહેલા પેવેલિયન પરત ફર્યા. પરંતુ આ પછી નાઈટવોચમેન તરીકે આવેલા યશસ્વી જયસ્વાલ અને આકાશદીપે જવાબદારી સંભાળી. જયસ્વાલે 164 બોલમાં 14 ચોગ્ગા અને 2 છગ્ગા સાથે 118 રન બનાવ્યા. આકાશદીપે 66 રન (94 બોલ, 12 ચોગ્ગા) ની શાનદાર ઇનિંગ રમી અને પોતાની ટેસ્ટ કારકિર્દીની પહેલી અડધી સદી ફટકારી.

આ પછી શુભમન ગિલ (11) અને કરુણ નાયર (17) સસ્તામાં આઉટ થયા. ટીમનો સ્કોર 229/5 થયો. અહીંથી રવિન્દ્ર જાડેજાએ 77 બોલમાં 53 રન (5 ચોગ્ગા) ની અડધી સદી ફટકારી. ધ્રુવ જુરેલે પણ 34 રન બનાવ્યા. અંતે વોશિંગ્ટન સુંદરે શાનદાર બેટિંગ કરી અને માત્ર 46 બોલમાં 53 રન બનાવ્યા, જેમાં 4 ચોગ્ગા અને 4 છગ્ગાનો સમાવેશ થાય છે. તેની ઇનિંગથી ભારતને સન્માનજનક લીડ મળી.

ઇંગ્લેન્ડ તરફથી જોશ ટોંગે 125 રનમાં 5 વિકેટ લીધી, જ્યારે ગુસ એચિનસને 3 અને જેમી ઓવરટને 2 વિકેટ લીધી. ઈજાને કારણે ક્રિસ વોક્સ આ મેચમાં બોલિંગ કરી શક્યો ન હતો, જેના કારણે ઈંગ્લેન્ડની બોલિંગ નબળી દેખાઈ રહી હતી.