અંતિમ વોટર લિસ્ટ પહેલા ગુજરાતમાં SIRમાં 17 લાખ અરજી

ગુરુવારે(29 જાન્યુઆરી, 2026) જાહેર કરાયેલા સત્તાવાર આંકડા અનુસાર, ગુજરાતમાં મતદાર યાદીના ચાલી રહેલા સ્પેશિયલ ઈન્ટેન્સિવ રિવિઝન(SIR) દરમિયાન 16.76 લાખથી વધુ અરજીઓ મળી છે, જેમાંથી 6.88 લાખ મતદારો તેમના નામનો સમાવેશ કરવા માંગે છે અને 9.88 લાખ મતદારો નામ કાઢી નાખવાની વિનંતી કરી રહ્યા છે.

અધિકારીઓએ જણાવ્યું હતું કે, 28 જાન્યુઆરી સુધીમાં અંતિમ મતદાર યાદીમાં નામોનો સમાવેશ કરવા માટે 6,88,116 ફોર્મ 6 અને 6A અરજીઓ સબમિટ કરવામાં આવી હતી. જ્યારે રાજ્યભરના વિધાનસભા મતવિસ્તારોમાંથી નામ રદ કરવા માટે 9,88,621 ફોર્મ 7 અરજીઓ પ્રાપ્ત થઈ હતી.

મતદારો પાસે 30 જાન્યુઆરી સુધી મતદાર યાદીમાં નામનો સમાવેશ, રદ કરવા અથવા સુધારવા સંબંધિત દાવાઓ અથવા વાંધા દાખલ કરવાનો સમય છે. ચૂંટણી અધિકારીઓએ જણાવ્યું હતું કે, દાવાઓ અને વાંધાઓની ચકાસણી એકસાથે કરવામાં આવશે અને યોગ્ય ક્ષેત્ર-સ્તરીય ચકાસણી પછી નિર્ણય લેવામાં આવશે.

ગુજરાતમાં SIR ઝુંબેશ ગયા વર્ષે 27 ઓક્ટોબરના રોજ શરૂ થઈ હતી, જેમાં તમામ 182 વિધાનસભા મતવિસ્તારોને આવરી લેવામાં આવ્યા હતા. જેમાં બૂથ-લેવલ અધિકારીઓએ મતદાર રેકોર્ડ અપડેટ કરવા માટે ઘરે ઘરે જઈને ચકાસણી કરી હતી.

ગણતરીનો તબક્કો પૂર્ણ થયા પછી, 19 ડિસેમ્બરના રોજ ડ્રાફ્ટ મતદાર યાદી પ્રકાશિત કરવામાં આવી હતી, જેનાથી જાહેર ચકાસણીની પ્રક્રિયા શરૂ થઈ હતી. અધિકારીઓએ જણાવ્યું હતું કે, SIRનો ઉદ્દેશ્ય એ સુનિશ્ચિત કરવાનો છે કે લાયક મતદારો બાકાત ન રહે, જ્યારે અયોગ્ય નામો યાદીમાં રહેતા અટકાવવામાં આવે.

ચૂંટણી પંચે સતત જણાવ્યું છે કે, આ પ્રક્રિયાનો હેતુ ચૂંટણી પહેલા મતદાર યાદીની ચોકસાઈ અને વિશ્વસનીયતા સુધારવાનો છે. સુધારણા પ્રક્રિયામાં 18 વર્ષની ઉંમર પૂર્ણ કરનારા પ્રથમ વખતના મતદારો તેમજ મતવિસ્તારની અંદર અથવા બહાર પોતાનું રહેઠાણ બદલનારાઓની નોંધણીનો સમાવેશ થાય છે.

વધુમાં મૃત મતદારો, ડુપ્લિકેટ નોંધણીઓ અને કાયમી સ્થળાંતર કરનારાઓને લગતી એન્ટ્રીઓ કાઢી નાખવા માટે ઓળખવામાં આવી રહી છે. ચૂંટણી અધિકારીઓએ જણાવ્યું હતું કે, એકવાર બધા દાવાઓ અને વાંધાઓ ચકાસવામાં આવે અને તેનું નિરાકરણ કરવામાં આવે, પછી અંતિમ મતદાર યાદી નિર્ધારિત સમયપત્રક મુજબ પ્રકાશિત કરવામાં આવશે.