કચ્છમાં મેઘરાજાની મહેર: પદાધિકારીઓએ કલેક્ટર અને DDOને મીઠું મોં કરાવી હેતથી વરસાદના વધામણા કર્યા

કચ્છ જિલ્લામાં લાંબા વિરામ અને અછતના ઓછાયા વચ્ચે છેલ્લા બે દિવસથી મેઘરાજાની કૃપાદ્રષ્ટિ થતાં સમગ્ર સરહદી પંથકમાં અનરાધાર અને સચરાચર વરસાદ નોંધાયો છે. ચાતકડોળે વરસાદની વાટ જોઈ રહેલા ધરતીપુત્રો અને માલધારીઓએ મેઘમહેરથી ભારે હાશકારો અને આનંદ અનુભવ્યો છે.

કચ્છની જીવાદોરી સમાન આ વરુણદેવની કૃપાથી સર્વત્ર ખુશાલી છવાઈ જતાં આજરોજ જિલ્લાના પ્રજાપ્રતિનિધિઓએ કલેક્ટર કચેરી, ભુજ ખાતે હર્ષભેર એકત્ર થઈને વાજતે-ગાજતે મેઘરાજાના પાવન વધામણા કર્યા હતા.

સાંસદ વિનોદભાઈ ચાવડા, ધારાસભ્ય પ્રદ્યુમનસિંહ જાડેજા તથા ધારાસભ્ય કેશુભાઈ પટેલ સહિતના વરિષ્ઠ પદાધિકારીઓએ જિલ્લા કલેક્ટર અમિત રાણાવસિયા તેમજ જિલ્લા વિકાસ અધિકારી ઉત્સવ ગૌતમ સહિતના ઉચ્ચ અધિકારીઓને મીઠું મોં કરાવીને શુભેચ્છા પાઠવી હતી અને આ નવજીવન સમાન વરસાદને આવકાર્યો હતો.

આ પ્રસંગે પદાધિકારીઓએ જણાવ્યું હતું કે, કચ્છમાં મેઘરાજાના આગમનથી પીવાના પાણીની સમસ્યા હલ થશે, સીમ-ખેતરો લીલાછમ બનશે અને પશુધન માટે પૂરતો ઘાસચારો ઉપલબ્ધ થશે. વરસાદી મહેરથી ખેડૂતોના મુખ પર સ્મિત ફરી વળ્યું છે અને સમગ્ર કચ્છ જિલ્લામાં તહેવાર જેવો ઉલ્લાસપૂર્વકનો માહોલ સર્જાયો છે.